銅鑼灣的繡花鞋

鵝出街唔使著鞋，不過平時都鐘意四圍貢，望吓有無鞋啱人類助手，行到糖街銅鑼灣廣場，見到賣繡花拖鞋 嘅 Lu’s Shoes 美華鞋舖～

美華其實係銅鑼灣屹立咗差唔多有40 幾年啦，一直由繡花拖鞋做起，亦有賣學生鞋、波鞋。

美華第二代老細陸生話俾鵝聽，美華原來係佢爸爸喺 1937 年成立。佢由細到大都喺舖頭幫手，已經分唔清自己算幾多歲入行啦。

•̀.̫•́✧

店內面嘅繡花拖鞋款式眾多，有藍色、金色、紅色，花紋非常精緻。鵝有印象，幾十年前人手整嘅繡花拖鞋風靡一時，特別受女士歡迎，不過陸生並無因為熱潮減退而結業，仲開埋網站俾人揀貨。近年興返復古風，佢仲話唔少已經移居海外嘅香港人返嚟買返對繡花拖鞋著添呀！

「點解我要做鞋舖？因為傳承囉！」對陸生嚟講，美華最大嘅意義在於傳承。唔單止係爸爸嘅舖頭，更傳承上一代老師傅嘅傳統手藝。

可惜鵝隻鵝腳掌嘅腳趾間有蹼，著唔到鞋，如果唔係鵝都想著住對咁靚嘅繡花拖鞋靚爆銅鑼灣吖！