銅鑼灣仲有文具舖？！

鵝喺銅鑼灣 60 幾年，見證銅鑼灣超過半世紀變遷，店舖更迭係等閒事，唯有屹立街頭上嘅老店先至係鵝眼中嘅奇景。

銅鑼灣有位舊商戶同鵝一樣，已經紮根呢度 60 幾年，陪住唔少學生哥、打工仔成長。

(๑˙  ̯˙๑)

行到去怡和街嘅圓形天橋附近，會見到有間舖頭櫥窗堆滿羽毛球拍，外區人未必有印象，但認識銅鑼灣嘅鵝友一定會講得出「賣羽毛球拍嗰間」或者係「電車站嗰間文具舖」──華生文具公司。隨住文具店買少見少，鵝不時會去幫襯㗎，你講得出嘅文具佢哋都會有。

一入推開華生道玻璃門，冇新式文具店嘅文具、精品夾雜，迎面見收銀台同埋筆架，店主樸實地賣文具。空氣瀰漫木架同膠紙嘅氣味，幾百呎空間放滿鐵櫃，擺放記事簿、label 紙、擦膠、較剪等等文具，加埋唔算好光猛嘅偏藍白調燈光，好似返返去幾十年前銅鑼灣嘅店舖咁樣，鵝有種莫名嘅親切感呢～

企喺收銀枱附近嘅李燕瓊（瓊姐）話俾鵝聽：「呢間舖頭係我大佬開㗎！」

華生其實搬過兩次舖，最初在禮頓道聖保祿附近開舖， 30 幾年前搬到舊時大丸百貨隔離（銅鑼灣記利佐治街同百德新街交界對面），之後再搬到現址。

瓊姐喺澳門出世，十兄弟姊妹入面排行第八。當年佢長兄一個人嚟香港做生意，開咗華生，之後就邀請成班細佬妹過嚟幫手。瓊姐話，佢哋除咗過時過節外，一個禮拜七日都會係文具舖開工㗎！非常勤勉呢～

客人一入嚟，瓊姐就會即刻問佢哋想要啲咩，然後指引對方「邊行、邊個櫃、第幾格」，有時爽快地直接幫手拎埋，對文具擺放瞭如指掌。鵝去買文具都慳返好多時間，可以留返嚟散步～

ദ്ദി(៸៸›ᴗ‹៸៸ )

舖頭嘅文具款式，佢哋係邊間廠整，邊間廠又停產，對瓊姐嚟講全部「心裡有數」。鵝問：「咁你鍾唔鍾意文具？」瓊姐答：「有咩鐘唔鐘意吖，日對夜對吖嘛。」

日對夜對嘅係原子筆、筆刨、同記事簿等等嘅文具；難離難捨嘅係街坊、學生、屋企人。

瓊姐長駐嘅收銀枱，夾咗幾張過咗膠嘅A4 尺寸相。有以前銅鑼灣嘅大丸盛況，同埋佢同屋企人嘅全家福。

一講起屋企人瓊姐就笑到見牙唔見眼，仔細咁話畀鵝聽，邊個係姪仔、姪女。望住瓊姐咁開心，鵝個心暖笠笠吖！

相中嘅兄弟姊妹已經成家，有仔女，甚至抱埋孫㖭！不過年輕人有自己想法，瓊姐話，暫時都冇下一代繼承呢間文具舖，所以佢計劃做埋呢一代，就唔會再做落去啦～

(੭ ˃̣̣̥᷄⌓˂̣̣̥᷅ )੭⁾⁾

鵝友都應該留意到，舊式文具店買少見少，鵝感覺係社會開始電子化，對文具需求亦相應減少，有咩用手機記低囉！

瓊姐對於無人接手又唔太失望，覺得係隨遇而安。佢都留意到，無論係學生定係打工仔都已經好少用紙、筆，再加上網上平台盛行，買文具更方便，都唔洗落文具店啦！

咁不如賣下精品？瓊姐又覺得無謂購入精品「谷生意」，多年來只購入日本同埋內地生產嘅文具雜貨，堅持只賣樸實無華嘅傳統文具。

(•̀ᴗ•́)و ̑̑

呢份堅持讓華生廣結街坊、朋友，吸引唔少熟客幫襯～就好似係隔離羽毛球拍舖頭嘅老闆十妹拎咗啲蛋糕茶點過嚟同瓊姐一齊食下午茶，仲畀咗件蛋糕鵝㖭（可惜鵝食唔到，拎返屋企轉贈人類助手，借花敬佛，得咗！）

鵝諗起以前同人類助手一齊睇過嘅一套戲《Perfect Days》，片中主角雖然唔係開文具舖，但佢都係日復一日咁返工，閒時就去睇 cassatt 帶，每日都好有規律咁過。

瓊姐由 14 歲到今年 78 歲，大半嘅人生就係喺文具舖到渡過。鵝好奇：「咁你諗住幾時退休吖？」瓊姐只係笑笑搖頭。

日昇日落，年復一年。

或者對瓊姐嚟講，返工開舖，得閒就過維多利亞公園散步，同伙記吹下水，然後嗌埋十妹過嚟一齊食件西餅，就係瓊姐嘅 Perfect Days。

雖然瓊姐對幾時退休呢個問題無答案，但華生絕對係好幾代銅鑼灣人嘅共同回憶。

就好似依家仲有「大丸有落」一樣，希望鵝哋都可以繼續記住「電車站個間文具舖」呢！

(•̀ᴗ•́)و ̑̑