香港首條橫跨行車道行人天橋：禮頓道天橋
10小时前
讀畢需時 2 分鐘
兩年前，鵝曾經分享過銅鑼灣奧運橋翻新嘅事。講起呢條橋，大家對佢最深印象可能係色彩繽紛嘅外表以及寫上奧運年份嘅梯級。其實佢成為奧運橋之前都大有來頭㗎～佢係本港第一條「橫跨行車道」嘅行人天橋！
時間返返去1960至1970年代，當時香港城市急速發展，人車爭路嘅情況日漸普遍。為咗令路面交通暢順同保障行人安全，政府開始大舉興建行人天橋同隧道，將行人同車輛以上下空間分層隔開。根據路政署《香港的行人天橋及行人隧道》資料顯示，1963年禮頓道天橋正式啟用，位於銅鑼灣禮頓道與伊榮街交界、聖保祿學校旁邊，正正就係奧運橋嘅前身，亦係全港首條「橫跨行車道」嘅行人天橋。
鵝非常好奇佢以前個樣，睇返社交媒體上嘅舊相，最初設計上只有天橋兩端設梯級，大家依家見到中間嗰條樓梯係後期加建嘅～以前橋身同階梯都採用素面石屎灰色外牆，外觀比較樸素。鵝依家周不時都會經過呢條橋，發現除咗梯級上面有色彩繽紛嘅奧運年份同主辦城市外，橋身都畫滿咗奧運主題嘅壁畫，十分吸睛～大家又數唔數到上面總共畫咗幾多項奧運項目呢？
(◍ˊㅿˋ◍)
另外，鵝要澄清一個小迷思，做research嘅時候發現好多網上資料都誤傳呢度係「全港第一條行人天橋」。翻查路政署資料，呢個講法並唔準確。香港歷史最悠久嘅行人天橋其實係1942年沿山坡興建嘅寶雲道行人天橋。所以按照路政署嘅講法，禮頓道天橋其實係全港第一條「橫跨行車道」嘅行人天橋先真。
依家大家習慣叫禮頓道天橋做「奧運橋」，全因2002年灣仔民政事務處採納咗聖保祿學校師生嘅設計概念，將天橋梯級油上歷屆奧運會舉辦嘅年份同城市。如鵝之考察，由於梯級數目有限，翻新後奧運會資訊都只係去到2016年里約
奧運，不過憑着色彩繽紛嘅特色，已經令佢喺天橋界中鶴立雞群喇！
🔗禮頓道天橋嘅舊相Link:
留言