銅鑼灣背面有間畫室

鵝沿屋企，一路向東邊走，由禮頓道走到銅鑼灣道，遠離大型商場。街道愈行愈靜，遊客少、街坊多，繼續向大坑方向散步時，再次遇到位落於銅鑼灣道嘅一間地舖畫室。

呢間畫室門口係落地玻璃，正展示緊一幅以黃色為背景，畫有鴕鳥及人像嘅油畫，完全遮蓋店內空間。印象中，每隔一段時間，鵝經過見到嘅油畫都唔同，不過呢到多年來都係同一間畫室──Atelier 47。

(・∀・)

畫室就好似雪花玻璃球一樣，藏著一個同商場、食肆格格不入嘅奇妙空間，令鵝忍唔住放慢腳步，想一窺裡面嘅藝術世界。輕輕推開玻璃門，就見右邊幾個畫架上面放上未畫完待續嘅畫布，牆上就掛上幾幅已完成嘅作品。

鵝覺得銅鑼灣道就好似銅鑼灣嘅背面咁，大家來銅鑼灣，甚少經過呢個位置。鵝好奇，究竟呢間畫室，點解會選擇嚟到銅鑼灣，仲要捨棄人流多，比較繁忙嘅地段，反而要係鬧市一隅呢？

(｢･ω･)｢

無獨有偶，畫室負責人陳楚文（陳Sir）同鵝一樣都咁鐘意散步，同呢間舖頭嘅緣份亦由此而起。

陳Sir由細到大都鍾情於畫畫，一直夢想成為藝術家。為咗追夢，陳 Sir 喺 1977 年時遠赴法國巴黎學畫畫，踏上藝術專業嘅旅途，一直去到 1993 年左右回流返港。

佢最初喺正形設計學校教咗大約兩年藝術，之後又喺海怡半島教畫畫興趣班，一路工作一路摸索自己嘅藝術路。當時佢已經萌生自立門戶嘅念頭，開屬於自己嘅畫室！

坐言起行，物色租盤期間，佢偶爾喺銅鑼灣街頭散步，經過中央圖書館時，忽發奇想，不如去睇下「銅鑼灣嘅背面」係個咩嘅地方？於是陳 Sir 離開人來人往嘅高士威道，轉入銅鑼灣道，竟然咁啱得咁橋，見到銅鑼灣道有舖位出租！

呢個舖位對住銅鑼灣道休憩處，再行多兩步就已經到達大坑一帶，非常寧靜，與銅鑼灣鬧市嘅距離算係「既遠又近」。陳 Sir 話，見到入面有個小閣樓，樓底高，大大減低咗壓迫感，一見鍾情，同業主洽談時仲要一拍即合。於是乎，位於銅鑼灣道47號嘅畫室 Atelier 47，就喺 2002 年正式開業教班，眨眼至今已經 24 年。

( ^ω^)

畫室除咗學生嘅畫作，亦有唔少係陳 Sir 嘅作品。其中一幅掛喺畫室最深處嘅牆壁，畫布面積大，覆蓋成幅牆。

作品以藍色為背景，一名東南亞嘅部落原住民指向遠方，頭頂有一隻斑犀鳥展翅翱翔。

呢幅係陳 Sir 嘅《People on Earth》系列作品之一。系列以世界唔同嘅民族部落嘅原住民同動物為主角，佢已經畫過美洲、澳洲同非洲，最近畫緊亞洲嘅原住民。

「我認為藝術應該係國際嘅。」陳 Sir 同鵝講，希望自己嘅藝術唔好只局限於眼前，而係要向遠方望，亦要表達對世界嘅人文關懷。

ヾ(´ε`ヾ)

鵝數下鵝掌，咁咪差唔多已經圍住個地球轉咗一圈囉！

原來鵝最初喺門口見到嘅畫作，原來都係屬於呢個系列。鵝再仔細啲望，其實係原住民用棍承托住鴕鳥。呢幅搶眼嘅畫作成為銅鑼灣嘅其中一道風景。

臨別之際，陳 Sir 指住門口玻璃門方向，「你睇下呢到幾舒服」。佢坐喺自己嘅工作枱，視線正好斜斜哋望住玻璃門。透過呢度門，見到對面小公園有棵好高大嘅樹，陽光自樹葉間灑落，偶爾會見到有人放狗，或者有剛放學嘅學生捧住書本去中央圖書館。

原來由畫室裡面望返出嚟，銅鑼灣係咁恬靜悠閒嘅。

(◍•ᴗ•◍)ゝ

鵝一直都覺得銅鑼灣社區有好多面向，或者係集行街、睇戲、食飯於一身嘅旺區，亦係返工放工、返學放學嘅地方。

而陳Sir嚟講，銅鑼灣係一個寧靜，可以無顧慮作畫嘅地方，讓佢嘅藝術走出地區限制，自由自在，創作無數主題。

(▰˘◡˘▰)

唔知對於咁多位鵝友嚟講，銅鑼灣又係一個乜嘢地方呢？