遊趟開篷巴士河

大家有冇啲想做，而又一直未去做嘅事？鵝嘅其中一樣係搭開篷巴士。因為首先要專登離開銅鑼灣，再搭返嚟～～趁新年動力大啲，鵝終於付諸實行！

ദ്ദി (⩌ᴗ⩌ )

雖然當日得11度，但烈日當空，曬到鵝頭頂暖笠笠。嚟到中環碼頭，鵝望望城巴「H1」站牌，興奮地衝上上層，專登坐喺冇遮冇掩嘅車尾！一開車，嘩，吹到鵝毛都亂晒，勁過打風呢！！！

凍還凍，眼前嘅美景懾鵝心魄。搭開篷巴士，同搭普通雙層巴士或者電車上層嘅最大分別，就係冇咗車頂。鵝彷彿一伸鵝掌，就可以掂到街上嘅招牌、架空電纜、天橋底，同埋喬木嘅枝葉！唔同嘅色彩、聲音、氣味喺開放嘅環境迎面而來，個感官體驗好鮮活，每秒都好刺激～

✺⸜( •ᴗ• )⸝✺

鵝不自覺一路頭岳岳，除咗因為天色好靚，仲有就係啲大廈有高有矮、有肥有瘦，個天空窄完又闊、闊完又窄，好似淨係空咗中間嘅俄羅斯方塊遊戲咁，睇到鵝入晒神⋯⋯

搭完 45 分鐘，搭開巴士嘅鵝都暈晒車浪，不過呢個都係個好奇妙嘅體驗啊～