跟車cam人遊銅鑼灣

鵝吸氣、挺胸收腹，一秒跳上的士副駕駛座，準備喺銅鑼灣遊車河！鵝鐘意發掘銅鑼灣嘅新鮮事物，平日多行路、少坐車，點解今次破例？事源人類助手早前介紹咗一條主題為香港奇觀嘅短片，提及銅鑼灣加路連山道有一間被高樓大廈包圍住嘅「獨立屋」！望真啲，條片由 YouTube短片創作者「車cam人」製作，除咗拍低「獨立屋」的外部情況、街景，仲有佢搜集嘅剪報、地皮資料等，絕不馬虎～

左諗右諗，鵝決定鼓起勇氣邀請「車cam人」帶鵝漫遊銅鑼灣，不久就獲得佢首肯，趁上月一個天朗氣清嘅早上見面傾偈、遊車河。甫上車，呢位只有 24 歲嘅的士大佬笑笑口，靦腆地打招呼，為咗保護自己的私生活，佢請鵝稱呼佢做「車cam人」，亦不便上鏡，著鵝為佢架的士留影，見車如見人。

車cam，意即安裝在係車上的錄影器，佢平日主要會將車cam拍低嘅行車片，配上自己嘅旁白，剪輯唔同主題嘅短片放上網，例如的士司機日常、香港奇觀、消失中的香港－即將折卸的建築物等等。佢嘅YouTube頻道每日都會上載新短片，至今已經有超過七萬訂閱者，其中一條個唐樓嘅短片更加有62萬點擊率。

唔通佢為咗做YouTuber而揸的士？原來「車cam人」從小都對車輛情有獨鐘，細個扭計時，屋企人就會帶佢去搭同一條巴士循環線，仲試過每日都買一架玩具車畀佢收藏。成年後嘅第一件事就喺考車牌，一take pass！佢大學畢業後，好快就成為朝九晚五嘅打工一族，做咗兩年，發現自己唔鐘意係辦公枱前坐定定，最鐘意係喺坐車，加上係前同事嘅鼓勵下，考的士牌之外，亦開設「車cam人」嘅YouTube頻道。

一路講，我哋由掃桿埔一帶駛返去銅鑼灣鬧市，準備返鵝屋企，「車cam人」熟練哋搵咗摩利臣山道附近一條小路，兜返去禮頓道，「我發現呢個位可以好快兜返入去銅鑼灣鬧市，唔係咁多人知」。果然，不出一分鐘就由銅鑼灣邊界深入銅鑼灣，避咗塞車。的士繼續前進，佢望住一個商場對出嘅的士站，輕輕一指，「呢個位置嘅業權屬於商場，即係車輛違規唔可以抄牌，只可以叫商場職員鎖車」。嘩，鵝真係長知識，一路用腳散步，都唔知呢啲資料呢～

「車cam人」做咗的士司機已經三年，仍然樂此不疲，最鐘意係透過車頭玻璃發掘樂趣，有時開車經過一啲特別嘅建築，或者收到觀眾報料，例如兩棟唐樓中間嘅樓梯、或者頭先提到嘅「鬧市中的獨立屋」，佢都會先去到土地註冊處查冊、地政總署搵圖則，確保自己講出來嘅資料準確無誤，佢回想大學時，教授曾經提醒唔好講好似，或者似是而非嘅說話，漸漸養成謹慎嘅習慣，想講得實在啲，個人更加有自信，更重要係隨口噏過唔到自己嗰關。

過咗大半日，的士差唔多返到鵝屋企樓下，恩平道一帶，臨別在即，鵝好奇呢位年輕、高學歷嘅的士司機點解放棄收入穩定嘅全職工作，以「大學畢業揸的士」為榮。「車cam人」只係從容地講：「父母都喺職業司機，佢哋講左句揸車好辛苦之後，就無再提過任何意見」。呢句話對佢來講，既是提醒，亦是支持，自己的路自己選擇。

#企鵝散步

#紅的