銅鑼灣A-Z｜D for Ding Ding

D for …… Ding Ding!

自1904年開始，香港電車（叮叮）就喺港島嘅大街小巷穿梭，歷史仲耐過60年代出沒嘅鵝！電車主線全長約13公里，由西邊堅尼地城一直伸延到東面筲箕灣，仲有一條環形支線經銅鑼灣去跑馬地。

點解大家會叫電車做「叮叮」呢？

最主要原因係以前車長提醒行人同車輛讓路時，就會踩動地板嘅腳踏，敲響車頭個清脆鈴鐺，便會發出「叮叮、叮叮」嘅警示聲。另一種講法就同以前嘅售票方式有關，當年售票員會用打孔器，將乘客車票打孔，發出「叮」一聲，就代表車票已經使用咗。不過，售票方式去到 1976 年就取消咗，改為落車投幣喇。

◝(●˙꒳˙●)◜⚘

嘎～～鵝仲有一個小彩蛋要分享，其實依家仲有一架仿古嘅復刻版叮叮喺路軌上行緊！

呢架120號叮叮仿照戰後出廠嘅第五代電車（1949-1951年出廠），車上面嘅鎢燈、木窗框同機械式控制台都依照原本設計保留至今。最特別係，120號叮叮係全港唯一「左上右落」設計。車尾樓梯設於左邊，即左上右落，在後面上車於左邊樓梯上上層，再於上層前方右邊落樓梯。樓梯底多咗個「暗格位」，就係以前售票員嘅專屬位置。下層係兩排面對面坐嘅木長櫈，上層就有充滿歷史感嘅木藤椅。

120 號叮叮真係可遇不可求㗎，唔知各位鵝友有冇試過咁好彩，搭過呢架復古叮叮呢～～

✃┄┄✁┄┄✃┄┄✁┄┄✃

銅鑼灣 A-Z

✃┄┄✁┄┄✃┄┄✁┄┄✃

受英國具代表性嘅街道地圖集《Geographers' A–Z Street Atlas》（利用 A 到 Z 排序索引，讓人在幾秒之內精準查出任何街道網格）以及日本「半農半 X」倡導者鹽見直紀嘅「A to Z」社區觀察法啟發，鵝今次以 26 個英文字母為索引，由 A 到 Z 逐一拆解，帶住一班「鵝友」全方位探索銅鑼灣呢個集摩天商場、歷史古蹟同綠意自然於一身嘅繁華社區！