top of page

24小時誠品


▲ 呢張皮椅 & 旁邊嘅座地燈係紀念誠品已故創辦人吳清友嘅位置,每間誠品書店都有呢個位。鵝非常欣賞呢個低調而優雅嘅紀念方式。


今個星期六晚,#銅鑼灣 #誠品書店 將會通宵營業,慶祝呢間分店開幕11週年。


當日下晝2點開始,誠品就會有連串活動,包括《城市散步學》作者 @黃宇軒 新書分享會、@CanCanMa 繪本親子工作坊等,夜晚喺誠品旁邊嘅 Urban Sky,仲有無伴奏合唱組合 @SENZA A Cappella & @黃妍 嘅表演,去到凌晨2點,就有紀念誠品創辦人 #吳清友 紀錄片播映,全部活動都係免費參加,自由入座。


睇睇2012年嘅新聞報道,原來 #銅鑼灣誠品 係誠品喺台灣以外嘅第一間分店,當時曾考慮喺 #中環街市 開舖,但中環街市活化方案遲遲未落實,仲棘住喺點改動「漂浮綠洲」上,而 #希慎廣場 又提供優惠租金(但冇透露金額),兼訂下十年租約,結果誠品就揀咗希慎,喺同年8月10日試業,11日正式開幕。


2012年8月10日,亦係希慎廣場開幕嘅日子。希慎廣場前身係興利中心,係 #三越百貨 嘅所在地,2006年興利重建,三越亦隨之撤出香港。


銅鑼灣誠品位於希慎8至10樓,舖面面積4.1萬平方呎,係全港最大嘅書店,標榜有10萬書目,以及每月舉辦幾十場藝文活動。


誠品董事長 #吳旻潔 當年就講過,銅鑼灣誠品店面有 85% 為書店,書店比例比台灣嘅誠品大,唔知依家仲keep唔keep到呢個比例呢?


當年誠品來香港都算大件事,開幕前一兩個月,報紙雜誌每隔幾日就update一下進展,好多人都好期待。其中一樣大家期待嘅,就係香港誠品會唔會 #通宵營業 呢?事關嗰個年頭,好多香港人去台北,都好鍾意通宵營業嘅 #敦南誠品 打躉,有時半夜三更喺嗰度,聽到廣東話嘅頻率仲高過聽到台語。


不過,銅鑼灣誠品開幕後,只有星期四至六晚通宵營業,試行咗一個月左右,至9月中,就唔再 #開通宵 ,因為除咗開幕頭嗰朕,基本上半夜2點後都極度靜鷹鷹。都啱嘅,開舖頭呢回事,即使冇客,燈同冷氣都要照開,又要安排人手,效益低又唔環保。


雖然冇開通宵,但銅鑼灣誠品生意應該都唔錯,至12月底,即開業四個後,誠品透露平均每日人流有3至5萬;至2013年中,董事長吳旻潔又表示銅鑼灣分店已有錢賺,


近年受疫情影響,街上嘅舖頭好多都早咗收舖,深夜嘅銅鑼灣亦無以前咁熱鬧。雖然係咁,目前全港唯一一間 #24小時營業#惠康,就係位於銅鑼灣 #記利佐治街。根據惠康網頁,銅鑼灣惠康係喺1998年10月23日開始通宵營業嘅。至2010年代,全港一度有十零間惠康全年無休。



點解全部都係大集團?銅鑼灣有冇小店開通宵?鵝決定搵晚唔瞓覺再行吓觀察下,詳情下回分解~

bottom of page