top of page

走進孔聖講堂聽君子之道

聽鵝友老飛說,有次他籌備一個 #加路連山道 導賞團,途經 #孔聖堂禮仁書院 ,探頭張望之際,獲該校一位老師盛情招待,參觀了校園各個角落,包括2020年被古諮會評為 #一級歷史建築 的 #孔聖講堂 ,教鵝有點羨慕。


於是,鵝也冒昧去信,希望可以參觀一下。


鵝很快就收到該校 #陳樹俊 老師的應允,鵝又邀請老飛同行。在春天一個木棉花漸開的日子,鵝們跟著陳sir,細看了這間有71年歷史的中學校園,也聽了一些陳sir在校41年來的故事。


比如,來到孔聖講堂,陳sir 純熟地解釋其歷史、結構和文化意義。於1935年啟用的孔聖講堂,旨在弘揚儒學,後來相繼開設兒童院和學校,至1953年發展成 #孔聖堂中學 。當中,舞台上孔子畫像旁的對聯尤其珍貴,由國學大師 #饒宗頤 所撰。


為了示範孔聖講堂音效之良好,陳sir站在台上,中氣十足地朗誦《禮記》〈禮運大同篇〉:「大道之行,天下為公,選賢與能,講信脩睦。故人不獨親其親,不獨子其子。老有所終,壯有所用,矜寡孤疾皆有所養。」果然,毋須咪高風,陳sir的聲線也響徹整個講堂。


本身任教地理科的陳sir,何以如此熟悉儒學經典?難道入得 #孔聖堂 ,都要識背經?


原來,40年來,每年農曆八月廿七 #孔誕 ,陳sir都擔任祭孔司儀,率領學生背誦〈禮運大同篇〉。陳sir 笑說,入校翌年說就獲時任校長李金鐘委以重任,就是因其聲線洪亮。陳sir又說,雖然學校有每年 #祭孔 的傳統,但不等於「拜孔子」:「孔子唔係神明,而係生活指導 。佢係萬世師表,值得我哋尊敬。」


【傳道 授業 解惑】


鵝好奇,聽講孔子推崇君子之道,其實 #君子 是什麼?


「君子係坦蕩蕩 ,一舉手、一投足,都充分體會一種以禮待人嘅精神面貌。 還有,君子就係要互相尊重,人同人之間以君子之禮去相處,要有熱誠,唔好欺騙。」陳sir如是說。

 

那麼,陳sir認為自己是君子嗎?


「我覺得係。」陳sir說:「我好熱愛我嘅工作。作為老師,應該傳道、授業、解惑。傳道就係講道理,授業即係教書,但令學生解惑先係老師一生一世嘅課題,點樣令佢產生無限動力?唔係話因為你高高在上,用權力來壓倒學生,而係以德服人。」


陳sir也自豪地說,在孔聖堂41年來,從不遲到、不早退、不請病假,「呢個記錄係好難打破嘅!到我今日為止,唔係冇病過,但唔知點解,都係放假先嚟病,咁衰嘅!」


【校園中的森林】


當老師數十載,陳sir當然也有激氣之時。他記得好幾次,曾次收到警察來電,反黑組有,重案組也有,叫他到警局接學生。記憶中最深刻的,曾有身穿校服的學生,在 #修頓球場 以牛肉刀架頸恐嚇同學。有記者更拍到肇事學生照片,並刊於報章,其後甚至上了電視。


事件嚴重影響學校收生,令孔聖堂一度面臨殺校危機。激心時,陳sir就會走到花園中孔子像附近的一棵 #大樹菠蘿 前,沉澱一下情緒。陳sir叫這個種滿大樹角落做「森林」,在這裡,他曾遇過貓頭鷹、鸚鵡、松鼠、野豬。這裡是全校空氣最好的地方,有環保署的空氣質素檢測為證。


陳sir鼓勵鵝在大樹前深呼吸,他說:「你聞到嘅係一種草嘅味道,喺銅鑼灣嚟講,係奢侈嘅。」


至2011年,孔聖堂轉型為直資學校,每一位學生都須經陳sir面試,「我哋呢度有教無類,但唔代表乜嘢學生都收。係你願意俾我教,我先教你。」 


【享受表演的老師】


陳sir說,一位成功的老師,就是一位成功的演員。


「我覺得教書啱我自己,因為我鍾意講嘢。同埋我天生嘅聲音,又或者我嘅個子,都係比較適合去演繹,好似一個演員咁。演員希望觀眾接受自己,而老師就希望學生接受自己。做老師應該要享受學生一直望住我哋既時候,有眼神嘅交流,係最享受嘅。如果唔享受這件事,就唔好做老師啦。」


今年66歲的陳sir,早達退休年齡,大可退休嘆世界。但陳sir自言未覺累,選擇繼續留下,全因享受當老師,「因為短暫相聚,影響佢嘅一生;因為你嘅示範、每天嘅叮嚀、每日付出嘅愛,無論幾曳嘅學生,都係感受到嘅。」


「冇嘢比改變一條生命更加好玩。」陳sir微笑道。


Comentarios


bottom of page