早排 #圓形天橋 篇文，有讀者留言話 #電車 站長會叫條天橋做 #CB天橋 ，企鵝又忍唔住去搵站長傾計，想知會唔會仲有啲形容地方嘅有趣講法。醒起圓形天橋附近、富豪酒店旁，咪有個電車掉頭位嘅，電車車長們又會點稱呼呢個位置呢？
站長教路，嗰處原來叫「 #細圈 」。
咁有冇「大圈」、「中圈」㗎？
站長話佢哋得「細圈」，至於點解「細圈」叫「細圈」，佢都唔太清楚。「細圈」呢個名，究竟係幾時開始出現㗎呢？大家知道都可以話俾鵝聽！
翻查舊報紙，細圈係喺1967年3月啟用嘅，根據3月21日《南華早報》一則簡訊，喺細圈啟用前，東行電車往往要駛到跑馬地、北角或者筲箕灣至有得掉頭。
樂聲迴旋處連接四條路： #怡和街 、 #高士威道 、 #銅鑼灣道 同 #禮頓道 ，係一個橢圓形迴旋處，喺電車調頭位起好前，呢個橢圓形被電車軌劏開，理論上只有電車可以唔兜圈由怡和街直剷高士威道，其餘所有汽車都要圍住迴旋處氹氹轉。
樂聲迴旋處中間有個噴水池，但最出名嘅係嗰度好塞車。
由1950年代起，絕大部份同樂聲迴旋處有關嘅新聞報道，總會見到congestion 呢個字，以及唔同版本嘅改善計劃。
例如，喺1964年，政府策劃起一條行車天橋 （flyover）接禮頓道至糖街街尾，長約650呎，造價250萬港元，預計1965年動工，兩年後啟用；代價之一係拆咗個噴水池。
當時未有咁多交通燈，樂聲迴旋處塞車嘅嚴重程度係，往往需要出動半打警員指揮交通；警察交通部又會出公告，呼籲由大坑往中環方向嘅駕駛者，取道 #東院道 、 #加路連山道 、 #禮頓道 ，即係兜遠啲都好，盡量咪兜入樂聲廻旋處，事關嗰時由 #紐約戲院 揸車去 #銅鑼灣裁判司署 ，要塞成半個鐘至去到。
紐約戲院位於依家嘅銅鑼灣廣場二期，銅鑼灣裁判司署就喺電氣道20號，根據 Google Map 評估，車程4分鐘，腳程17分鐘，咁計法又真係塞得好誇張，唔知觀塘塞啲定樂聲迴旋處塞啲？
不過，去到1965年底，政府又話糖街街尾唔夠位，行車天橋計劃要再度過。但個噴水池已經拆咗⋯⋯
其後，隨住大坑道天橋喺1971年落成，交通大為改善，樂聲迴旋處改善計劃已無必要，政府於是改為喺過一個街口嘅怡和街、糖街同邊寧頓街興建行人天橋，至1980年代落實興建，亦即係圓形天橋嘞。
相關故事
〈 #無用之用：圓形天橋之考古與考現〉
相集
Comments