top of page

專營香港設計嘅文具店 —— 訪大樹文房


唔知大家係咪 #文具控 呢?鵝就係喇!見親啲濕濕星星細細件嘅文具,都會忍唔住手買少少~前排鵝散步去到 #時代廣場 嗰頭,見到有間樓上舖叫 #大樹文房 ,八卦貢上去望望,原來係間文具舖,專賣香港設計文具。店主 Pauline Wong 同鵝講,佢都係鍾意買啲小物嘅人,所以就開呢間舖頭賣吓文具精品。


揀喺 #銅鑼灣 開舖,Pauline 話自己係港島人,向來同鵝一樣成日蒲銅鑼灣,「不嬲都有感情,感情係由細到大 build up 到而家」,覺得銅鑼灣係港島人必去之處,「我行街、食嘢、轉車都喺呢度」,連約朋友都會揀喺銅鑼灣。六年前,咁啱有朋友搬舖而佢又想做吓生意,Pauline 就決定租咗呢個位於 #勿地臣街 嘅唐三樓單位,開咗大樹文房。

不過 Pauline 並唔係一開舖就決定主打 #香港設計 。最初係賣啲大路嘢,包括唔少日韓進口文具,但發現競爭太大,就決定轉陣,專賣香港設計,「我始終真係愛香港呢個地方,知道香港有好多值得人去認識嘅產品,咁我就閃過一下,香港有啲咁正嘅嘢,點解唔去 support 吓香港嘅 designer?」

揀咗賣香港設計產品之後,Pauline 話都有人潑佢冷水,覺得呢盤生意維持唔到,但 Pauline 就覺得「我都唔係賣啲好gimmick嘅嘢,我呢度真係賣設計」,因為「gimmick 嘢只可以玩一陣」,好嘅設計先係長久。好似由香港 Yuan Design Studio 設計嘅唔同繪圖尺同間尺,有把叫 T-ruler 係三角形設計,一把尺集齊四種量度單位於一身,仲可以度字體大細,好得意!


Pauline 話前年九月前,客人多數係外國遊客,「佢哋都知道呢度有好多本地設計嘅嘢,而呢啲嘢喺出面仲未見到。」到年尾,有內地客喺小紅書上介紹大樹文房,就開始多咗內地客幫襯。亦都因為咁,大樹文房除咗文具,亦出售 postcard,比一眾非本地客買下手信。鵝覺得 ditto ditto 嘅香港風景 postcard,同埋 Paper with Pen 嘅手繪香港風景 postcard 都非常靚,就算同樣身處香港,都可以寄俾朋友吖。

由喺銅鑼灣蒲,到近年喺銅鑼灣開舖,Pauline 話睇住銅鑼灣嘅變遷,覺得近排銅鑼灣靜咗,無以前咁熱鬧。「以前好多珠寶首飾店喺 ground level(地舖),但依家好多舖執咗」。不過,Pauline 亦都話,「仍然留喺度嘅舖頭,大家仲喺度咬緊牙齦撐落去,我哋呢啲樓上舖仔,都仲係努力緊,嘗試百花齊放」。


係㗎,大家來呢頭行街時,不妨多啲抬頭望,會發現好多驚喜㗎。


Comments


bottom of page