中央圖書館裏的感官體驗

步入中央圖書館，最吸引鵝嘅就係迎面嗰塊大玻璃幕牆，採光極好。

鵝友們都好鍾意館內安靜嘅氛圍，同出面車水馬龍嘅高士威道形成強烈對比。館內唔准大聲講嘢同進食，喺安靜到連揭書聲都聽得到嘅環境下，大家特別投入，集中力瞬間提升，可以好好溫書寫作。加上冷氣充足，大熱天時一入去簡直暑氣全消，真係好舒服呢～

聽鵝友講，佢細個好著迷於中庭嗰部透明景觀電梯，會特登由最高層坐到落最低層「遊𨋢河」，睇住各層人類喺度埋頭苦幹，感覺好有趣。呢種景觀電梯通常喺大型商場、五星級酒店或者高級寫字樓先見到，採用流線型嘅半圓玻璃設計，底部襯托住白色圓弧基座，有別於傳統電梯嗰種方方正正、又封閉又壓抑嘅感覺。

(・∀・＊)

鵝友的童年回憶

對好多人類嚟講，公共圖書館裝載咗唔少童年回憶。鵝友笑住同鵝講：「細個嗰陣，爸爸最鍾意將我哋兩姊妹『寄放』喺館入面，自己去忙公事。一放就係四、五個鐘。有時坐到悶，我哋會將啲書疊高築牆，甚至玩起捉迷藏。不過中央圖書館實在太巨型，我哋會自訂規矩：唔准匿埋喺某啲特定區域，驚會喺書海入面行散咗，或者被陌生人捉走。」

另一位鵝友分享，佢細個印象最深嘅係二樓兒童區嗰棵「大樹」。佢矗立喺兒童區嘅中心，樹幹上長咗一張親切嘅臉，一對慈祥嘅眼睛好似識得同小朋友傾偈咁。樹頂上茂密而綠油油嘅葉，令成個空間瞬間充滿咗大自然嘅感覺。佢細個最鍾意用手摸下嗰個粗糙嘅仿真樹幹，然後揀定一疊書匿喺樹下慢慢閱讀。可惜圖書館翻新之後，呢棵大樹無保留落嚟，只能夠長留喺一班小鵝友嘅共同回憶入面。

٩(・Θ・)۶

鵝搭電梯去到五樓報紙區，門一打開，就會聞到一陣好特別嘅「報紙味」，係油墨同紙張混合嘅味道。一排排報紙夾喺長棍上面掛好，整整齊齊咁按區域同名稱排列。喺電子螢幕橫行嘅年代，讀者要拎起重甸甸嘅報紙棍逐頁翻閱，呢種充滿儀式感嘅閱讀方式，喺鵝眼中格外難得。

喺報紙區坐耐咗，鵝發現中央嘅「聲音」係好特別嘅，有紙張摩挲嘅沙沙聲、電梯運作嘅輕微嗡嗡聲，同埋自修室入面人類篤鍵盤嘅節奏。呢啲白色噪音（White Noise）將煩囂隔絕，畀大家可以全心全意沉浸喺閱讀世界入面。

唔知對你嚟講，中央圖書館最令你記得嘅，又係邊一個角落、邊一種氣味，或者邊一種聲音呢？

(*ˊᗜˋ*)