鵝的中央圖書館漫遊記

今屆中學文憑試（DSE）圓滿結束，鵝終於可以大搖大擺行入去香港中央圖書館，搶佔傳說中嘅「海景位」喇！事關，呢座位於高士威道 66 號嘅香港中央圖書館，喺學界地位極高，係「溫書界」嘅 S （Super）Tier 頂級聖地。喺 DSE 或者大學考試嘅「溫書旺季」，自修室經常人滿為患，考生們都要提前申請入座證先可以優先分配座位。至於唔係考生嘅鵝，就要等到考完試先可以入去喇。

(･´з`･) 

館內樓高 11 層，空間感足而且光線充足，比起某啲侷促嘅地區圖書館，絕對係五星級嘅閱讀享受。經鵝一番明查暗訪，中央圖書館嘅自修室座位主要分布喺六樓、八樓同九樓。當中最令考生同鵝神往嘅，莫過於八樓同九樓嘅靠窗位置。呢度嘅座位正對住維多利亞公園，溫書溫到攰，抬頭望吓窗外，映入眼簾嘅係一片綠意盎然；望遠啲，仲可以見到維港海景，嗰種疲勞感真係瞬間消失晒。

「隔空交友」的故事

聽講，喺學生嘅世界入面，自修室曾經被戲稱為「學界蘭桂坊」！甚至仲有網絡小說以此為題，寫咗個愛情故事添。鵝友都忍唔住同鵝分享，喺佢嘅青春時代，去「中央」溫書其實係熱門嘅拍拖活動：「學生時代預算有限，想搵個唔使花錢、有冷氣、安靜得嚟又可以相處成日嘅地方，圖書館絕對係首選。」

不過，呢場約會嘅挑戰往往由「搵位」開始。鵝友話，嗰陣佢哋堅持要坐雙人位，於是兩個人好似雷達咁掃視全場，有時要搵成半個鐘先搵到位置。最驚險嘅係每逢考試旺季，大家要分頭去唔同樓層「搜捕」空位。結果因為圖書館太大、層數太多而行散咗：「往往一個喺 六樓搵到座位，另一個就迷失在.＊ 九樓﹍×°座位迷宮°°°×入面，想搵返對方真係好似大海撈針咁！」呢種學生時代青澀嘅陪伴，鵝聽落都覺得好青春啊。

( ˶´⚰`˵ ) ♡

除咗戀愛故事，鵝友仲遇過一種好得意嘅「交友方式」。佢記得公開試期間，好唔容易喺角落搵到個位，發現枱面貼住前人留低嘅字條，上面寫住：「下一個溫書嘅人加油！」然後，又有另一種字體喺下面寫：「撐住呀，好快考完！」

呢張字條就咁一直流傳落去，變咗考生嘅留言板。大家素未謀面，甚至連對方叫咩名、係咩樣都唔知，但透過呢張字條隔空對話，冷冰冰嘅自修室好似多咗一份暖意。鵝覺得，呢種可能就係廢寢忘食嘅考試期間，最溫馨嘅小插曲喇！

「中央」溫書攻略 

要勇闖「溫書界 S Tier」聖地，鵝建議各位一定要裝備齊全，先可以喺呢場持久戰入面生存落嚟。首先，週末上午同放學後時段乃peak hours，九樓、10 樓嘅「兵家必爭之地」真係一位難求；反觀平日正午或午後，就比較容易搵到空位。

至於考試期間嘅搶位策略，如果目標係傳說中嘅九樓海景位，請務必先喺網上預約，或者朝早 7:30 準時現身排隊。若果九樓不幸「爆滿」亦唔洗灰心，退守八樓單人雅座，或者潛伏喺六樓青少年圖書館上方嘅隱秘角落，都係避世讀書嘅好選擇。

考慮到長期作戰，首要任務係對抗嗰陣出名強勁、讓鵝隨時變「急凍企鵝」嘅冷氣！外套同保溫瓶絕對係暖身又暖心嘅生存必備。同時，記得檢查清楚電力儲備，確保手機同電腦唔會喺關鍵時刻斷電。如果感到腦力枯竭，請自覺移師到大堂旁邊的咖啡閣補給乾糧，幫自己「回血」。

以上就係鵝嘅私心秘笈，如果鵝友仲有咩中央圖書館嘅私藏位置或者生存貼士，歡迎話畀鵝聽，大家情報交換！

୧((〃•̀ꇴ•́〃))૭

（在此感謝願意接受訪問的鵝友：Crystal, Emil, Tinny, Samantha, Winnie 同埋 Zero！）