鵝頸街市天台遊樂場

上次鵝出動去搵邊度有水斟，見到地圖上標記住鵝頸街市天台有免費水機～

鵝一入到街市，發現入面完全無任何標示，又無升降機可以直達天台，搞到鵝喺街市南北座條天橋度行來行去，兜咗幾百個圈。最後憑住鵝嘅直覺（其實係誤打誤撞），終於俾鵝搵到條神秘後樓梯，成功上到天台！

為了防止大家步鵝後塵，請 mark 底呢條捷徑：喺北座搭扶手電梯上一樓，左轉推開道防煙門，再行多一層樓梯就到天台喇！

(●･̆-･̆●)

一推開木門，哇！原來街市天台別有洞天！係一個被密密麻麻高樓大厦圍住、1500 平方米嘅「粉紅色半戶外公共空間」。場內有幾張戶外餐枱、幾隻比小朋友玩嘅搖搖馬，仲有四張好有年代感嘅水泥乒乓波枱。

鵝好奇想知，點解鵝頸街市天台會設有遊樂場呢？

原來呢個設計源於1960 年代，當時香港好多基層家庭嘅生活空間又細又逼，小朋友無乜玩樂嘅地方。政府為咗方便街市嘅小販可以一邊開工、一邊照顧仔女，同時為區內小朋友提供安全嘅玩樂空間。1965 年落成嘅舊灣仔街市，就係香港首創第一個「天台兒童遊樂場」，然後好多區嘅街市都跟住咁樣設計。鵝頸街市喺 1979 年 12 月啟用，設計上同樣屬於「複合式街市」，分為南北兩座，中間用天橋連住橫跨灣仔道，入面除咗有各類攤檔同熟食中心，當然唔少得呢個天台遊樂場啦！

不過，如果純粹以「兒童遊樂場」嘅角度嚟睇，呢度大概係全港最唔吸引嘅遊樂場之一，得幾隻搖搖馬、幾張乒乓波枱，今時今日嘅小朋友上到嚟肯定提唔起勁。

( ºΔº )

神奇嘅地方係，據鵝喺平日午飯後時段嘅觀察，天台遊樂場反而變成咗家傭姐姐、街坊、返工族同埋喺附近做戶外工作嘅工人嘅好去處。大家喺度休息、捉棋、練功、打橫喺波枱瞓晏覺；家傭姐姐喺度同朋友仔傾偈聚餐。上到嚟，完全隔絕咗下面乾濕貨市集同埋銅鑼灣鬧市嘅繁囂，大家各自用自己嘅方式使用呢個公共空間。呢度有足夠嘅休息位，康文署仲放咗部自助水機比大家使用。而因為天台位置夠晒隱蔽、風涼水冷，意外成為咗一個好受街坊歡迎嘅「秘密基地」。