已經75歲嘅黃松林師傅，當年係跟香港四大裁縫之一、已故巨星張國榮嘅爸爸張活海喺中環學師。當年「Tailor Cheung」呢個大名已經享負盛名，就連荷里活影星出埠嚟香港，就會搵張活海造衫，亞弗列·希治閣（Alfred Hitchcock）同威廉·荷頓（William Holden）都係Tailor Cheung嘅客人之一。嗰陣嘅黃師傅做吓跑腿，「嗰時好少人工㗎咋！」當年學師好簡單（亦好唔簡單），企喺師傅隔離睇實，「學到幾多就幾多，唔會點樣教你㗎！佢講乜就乜啦，我又唔敢say no」，學師至少五年，就可以自己落手造一套西裝。除咗向張活海學師之外，黃師傅仲有跟過名牌Giorgio Armani嘅技術總監學習，「我哋成班裁縫去聽吓，就直頭好啦！」
直至60年代，黃師傅就經行家介紹，到當年已經喺銅鑼灣嘅「大華疋頭」同「大華時恤」工作，「都要出去江湖度闖吓啦」，轉眼就做到而家。「大華疋頭」同「大華時恤」其實係由「大同腊味」所開。本身開燒臘舖嘅老細，因為有位親戚做洋服，覺得有利可圖，於是就喺格離開舖。直至四、五十年前，黃師傅話當時老細覺得「都賺唔到幾多錢，嘥氣！」就將舖頭交俾黃師傅，黃師傅就笑住同鵝講，「梗係肯接手啦！要食飯㗎嘛！」度身、裁剪、至縫製，亦係裁縫要做嘅工作，除咗黃師傅親手做之外，其他師兄弟又會一齊整，度身訂造嘅西裝平均每套要三個禮拜起貨。
因為南華會就喺附近，當年大華洋服「就整吓球隊啲（西裝）衫褲」，亦會造埋南華會員工嘅制服，「好似佢有個桌球部，有啲職員要著吓西裝，我哋就做嗰啲」。經過時代嘅變遷，唔少地方用投標方式揀承辦商，「唔同往時做開嗰啲就搵嗰啲」，黃師傅都無再幫南華會整衫喇！而家嘅客人，除咗幫襯開嘅熟客之外，仲有唔少係後生仔，黃師傅話啲年輕人上網搵好款式，就會拎去比黃師傅度身訂造，仲有客人會搵黃師傅整「踢死兔」結婚嘅時候著。每套西裝千幾蚊起，黃師傅堅持繼續用外國布料，「咁你收得人哋咁嘅價錢，大陸嘅布係爭少少」。
ㅤ
香港地寸金呎土，大華洋服搬過幾次。最初最初舖頭喺邊寧頓街，十年前就搬到而家呢個舖位，「愈搬愈入愈搬愈入，不過有地舖已經好好㗎喇」，但佢從未離開過銅鑼灣，除咗因為啲熟客仔喺晒銅鑼灣之外，仲因為黃師傅同鵝一樣，都係住喺銅鑼灣！聽黃師傅講佢嘅生活好chill㗎，朝早起身飲茶、行吓維園再去打網球，「係正呀！」
ㅤ
喺銅鑼灣生活同工作咗咁多年，黃師傅對銅鑼灣街坊有好高評價，「銅鑼灣人幾好㗎！街坊街里會打吓招呼，又好禮貌又斯文」。有客人細細個喺附近讀書嗰陣已經幫襯黃師傅，到大個出去社會工作之後，再搵返黃師傅造衫，令佢覺得好難忘！
ㅤ
目前黃師傅每個月仲會做20至30套西裝，算係搵到啲可以維生，「你而家出街，都好少見有裁縫舖啦！啲裁縫佬都死得八八九九喇！」鵝聽到呢度，覺得有啲心酸，裁縫手藝又有無人會承傳？「而家無人入行㗎喇，你教佢都唔學呀！」做咗成世裁縫，黃師傅同鵝講，其實搵到自己有興趣嘅工作再做一世，唔係咁簡單㗎。黃師傅就形容裁縫係夕陽行業，因為相比起連鎖時裝店，度身訂造價錢貴啲、款式亦都無咁多，不過黃師傅就同鵝講唔會咁易放棄，「做咗幾廿年又有班客，做到梗係繼續做啦！如果第日真係收樓（重建），就當退休啦！」
ㅤ
