銅鑼灣有個小印尼

銅鑼灣糖街一帶有唔少印尼餐廳，如果鵝友有印象，鵝前排介紹過印尼姐姐最愛美食，其實都係喺糖街八吓街坊同搜集資料㗎～鵝友可能都知道維園、糖街一帶更有唔少印尼人聚集，佢哋得閒就會好似鵝咁，喺附近四圍貢，同同鄉傾下計、買吓家鄉食物。

◝(　ﾟ∀ ﾟ )◟

話晒都係鵝地頭，點可以唔去認識吓來自印尼嘅鵝友？糖街有間 Kampoeng 餐廳，地舖擺放咗好多印尼小食同熱帶水果，地底就係餐廳，主打印尼菜。店員Sudiono Murhidayati好熱情，係咁捉住鵝傾計，介紹眼前嘅家鄉美食，有班蘭糕點、香葉糯米雞等，仲話因為要食正宗嘅，每星期喺印尼空運材料嚟香港～原汁原味咁話！鵝試咗素食甜品，食到唔願停呢～

(๑´ڡ`๑)

一路傾，不時有客人嚟買小食，Sudiono不時「轉台」，講吓廣東話，又講吓印尼話，超純熟，等鵝下次教佢講鵝文先，相信佢一定會學得勁快～

佢 35年前、15歲時嚟香港任職外傭，做咗 6 年之後，認識咗港人丈夫，因為平日好鐘意喺銅鑼灣搵同鄉聚舊，有香港身份證後就任職印尼餐廳侍應，一做就已經近 30 年啦～佢笑住話好鐘意香港呢個地方，佢覺得只要肯做、勤力，無論咩學歷同背景，都會搵到工作機會。而銅鑼灣就更加係佢最鐘意嘅地區，交通方便之餘，每個星期日仲會見到唔少印尼同鄉，好熱鬧～

居港多年，佢平時喺屋企會煮中餐，例如蒸魚、炒菜，返到餐廳就食返家鄉菜，口味隨時可變。不過有啲嘢佢都未適應嘅，就係好怕凍啦～印尼位於赤道附近，全年溫熱多雨，習慣炎熱天氣嘅印尼人，當然會視香港冬天係嚴寒啦～香港冬天氣溫偶爾會跌到個位數字，鵝都想像到嗰陣時佢有幾凍！

（´◔ ₃ ◔`)

另一位同樣來自印尼嘅店員 Leli Purwatiningsih 同樣先任職外傭 ，之後經過香港丈夫介紹後嚟到餐廳做侍應，數數手指，加入餐廳已經有 6 年啦。佢結婚後融入香港社區，特別喺學習廣東話上，落咗唔少苦功。佢覺得喺銅鑼灣工作最大得著係可以喺印尼社區生活，見返印尼同鄉。

根據入境處數目，2024年香港有36萬外傭，當中來自印尼嘅傭工就有近16萬，而在港印尼籍人士，除咗外傭之外，仲有從事其他職業。一堆冷冰冰嘅數字背後都代表屬於佢哋嘅故事，唔少鵝友都會疑問點解銅鑼灣會有咁多印尼人聚集，成為大家心中目嘅「小印尼」，相信維園一個咁大嘅公共空間，加上鄰近領事館，都係一個吸引因素。鵝散步時，都好享受喺唔同社群當中，因為只要大家搵到共同語言同價值觀，無論來自世界邊個地方，我哋都一齊喺社區之中生活，互相尊重彼此嘅文化。

#企鵝散步見聞

#小印尼