銅鑼灣A-Z｜B for Bowrington Bridge

B for …… Bowrington Bridge!

講起鵝頸橋，大家係咪會諗起堅拿道天橋？但原來此橋非彼橋也！話說早喺開埠前，由黃泥涌峽流入大海嘅水流又長又窄，仲彎彎曲曲好似隻鵝頸咁，所以黃泥涌嘅村民叫佢做「鵝澗」。1850 年代，利園山同摩利臣山嘅交界仲係一片低窪地，每逢大雨都會水浸，變做泥沼。所以時任港督寶靈就填高兩座山之間、黃泥涌村前嘅地，修建咗條運河。

因為唔係個個村民都好似鵝咁，入水能游、出水能散步，於是又起咗條木板橋供人過河，即係第一代鵝頸橋！後來為咗配合 1920 年代嘅填海工程，運河改建做暗渠，鵝澗同鵝頸橋從此埋喺地底。而家嘅堅拿道天橋一帶，仍然沿用鵝頸橋呢個名，鵝都覺得好親切呢。

(•̀ω•́)⸝ ʕᦏ

今時今日，鵝頸橋已經係馳名海外嘅「打小人」勝地。每當喺電車上聽到此起彼落嘅「啪啪」聲，加聞到好勁嘅燒香味，鵝就知道自己返到銅鑼灣喇～

✃┄┄✁┄┄✃┄┄✁┄┄✃

銅鑼灣 A-Z

✃┄┄✁┄┄✃┄┄✁┄┄✃

受英國具代表性嘅街道地圖集《Geographers' A–Z Street Atlas》（利用 A 到 Z 排序索引，讓人在幾秒之內精準查出任何街道網格）以及日本「半農半 X」倡導者鹽見直紀嘅「A to Z」社區觀察法啟發，鵝今次以 26 個英文字母為索引，由 A 到 Z 逐一拆解，帶住一班「鵝友」全方位探索銅鑼灣呢個集摩天商場、歷史古蹟同綠意自然於一身嘅繁華社區！