蛋糕唐樓的光與影

鵝有日散步時，望見銅鑼灣利園山道嘅唐樓群，諗起鵝友兼城市速寫人Ben以前畫過嘅香港唐樓，佢仲話好似「結婚蛋糕」呢～鵝即刻舔舔脷，咩都唔想理，淨係想三點三去食蛋糕～

(╥﹏╥)

其實Ben講嘅係舊式唐樓其中一個特色，即係愈近頂部嘅位置就愈尖，俯視嘅時候就好似啲結婚蛋糕一樣，一層層推上去，呈三角形，正式名係「斜面樓」。

(๑¯∀¯๑)

話說喺1969年，當時政府實施嘅「街影法」建築規例，從街道中心作為起點，不論喺咩地段，20層以下嘅建築物外立面需要呈76度角向上斜。

點解要咁做？因為要確保陽光可以照射到街道上，等途人感受到足夠嘅日照及通風。不過隨著香港嘅大樓愈起愈高，呢條規例最終喺1987年被撤銷。

(•ө•)

鵝講到口水都乾埋，終於夠鐘食Tea！一於去搵下有無新開嘅蛋糕舖先～

#企鵝散步見聞

#舊香港