自己書仔自己做

有追看鵝文嘅就知道，鵝友兼平面設計師 Forrest，最近設計咗《銅鑼灣字型散步》小誌，初稿後面世後三個月再出修訂版，希望作品盡善盡美。「我覺得好好玩，就係紙嘅選材、釘裝方法，然後加上字體、設計，然後手感、包裝……可以釋放我嘅自由，因為主題可以自己控制」。

(・∀・)

Forrest 講緊嘅係佢咁多年來堅持自資出版小誌（Zine）嘅原因－快樂同成就感。有別於平日嘅設計工作，小誌完全喺佢嘅個人項目，由主題、內容、設計、甚至係紙質都係佢一手包辦，自由度極高。其實 「Zine」 呢個字，可以理解為 「Magazine」（雜誌）取去頭四個字母，亦係「Fanzine」嘅縮寫，屬於發行量較低嘅非主流雜誌或報紙，題材小眾。

哦！鵝即刻諗係：「自己書仔自己做」～

(ᕑᗢᓫ∗)˒

其實 Forrest 早係 2014 年，已經拉埋其他藝術家朋友落水，發行小誌《薄簿仔》，每期都有特定主題，各自創作，大家將作品湊合成一本小誌，六年間出咗 13 期。每本小誌嘅出現，都填滿咗 Forrest 嘅靈魂，為佢嘅創作路叉叉電，「未必每個作品我都好滿意，但其實都可以透過自己嘅實驗或者想法去磨練，有時可能接受佢嘅唔完美，有時又覺得好滿意。」

佢創作嘅小誌紙質，同平時雜誌嘅唔同，佢選擇用廣告紙，「通常都係用來做包裝嘅日本紙來，佢個缺點就係會穿透，所以大部份人都未必鐘意拎嚟做印刷」。其實創作小誌呢件事一啲都唔「小」，Forrest 為此購入一部印刷機放喺坪洲屋企，由設計到印刷都一手包辦，選用唔同紙質、特別嘅墨水，甚至連過膠、盪金都玩勻。

◔.̮◔✧

講返字體研究，Forrest 不時會拍低特別嘅街頭字型，例如舊餐廳、店鋪、街招等，做完資料搜集之後再放上網同大家分享。佢對字型嘅熱愛源於佢平日喜歡觀察城市，而招牌則係其中一種溝通媒介，印象份外深刻，近年旅居東南亞時，曾經出版越南街頭字款嘅小誌《字款混雜的越南街頭》。

早前 Forrest 主持銅鑼灣字型散步活動，自發設計咗《銅鑼灣字型散步》小誌，前後行左幾次銅鑼灣，為不同招牌拍照，再做資料搜集。Forrest 話，「大家以為銅鑼灣都係新招牌，但無諗過有咁多舊招牌」，由中央圖書館至聖保祿修院一帶，發現最多古早香港中文字類型，例如 50 年代隸書體，以至希雲街一帶嘅50、60 年代字款、李漢港楷等，甚至千禧年代十分流行嘅新細明體，都可以喺銅鑼灣搵到。佢仲留意到，利園山道一帶有唔少英文字牌，大家行過可以留意下呢～

(*´◒`*)

Forrest 臨走之前，仲帶鵝去觀賞燈籠洲街市入面嘅書法字招牌。其實，正因為城市持續發展，呢種新舊交融嘅特色，先可以同時出現喺香港街頭每個角落。

٩(｡・ω・｡)و

#企鵝散步見聞

#銅鑼灣招牌

#小誌