樹底嘅白遮

今日人類助手食完飯返嚟，show咗張菇菇相俾鵝睇，「啱啱喺 #希慎道 見到有幾粒小菇菇，你睇！」

(⊙ ө ⊙)

相入面嘅菇菇，就好似一把把啡色波點嘅白色遮，插咗喺紅桂木嘅樹幹底，勁得意。鵝急不及待，左邊翼一枝腳架，右邊翼一部相機，馬上就拉埋助手落樓帶鵝去睇菇菇。

去到紅桂木樹下，左望望，右望望，都唔見菇菇嘅蹤影。助手話：「應該俾人摘走咗啦，得返兩粒好細粒喺旁邊。」可惡呀，竟然咁快就被清除咗，鵝嬲到用鵝掌𨂽地呀！哼！

(,,Ծ ‸ Ծ,, )

無可奈何之下，鵝唯有影吓淨低嘅兩粒「菇仔」俾大家睇啦。近距離影，先發現原來菇菇上面嘅啡色一點點係鱗片，而且菌柄個底有幾滴琥珀色嘅水珠，仲有一個好似救生圈咁嘅菌環。唔通菇菇就係走咗去游水，所以先唔見咗？

返到屋企，鵝上網查吓究竟係乜菇菇。原來係一種叫「滴淚白環蘑」嘅 #傘菌，係市區常見嘅真菌之一。佢哋生長喺腐土或者落葉堆入面，而菌柄上嘅「淚珠」就係佢個名嘅由來。資料話唔建議食用呢隻菇。如果真係有人摘咗，再餓都唔好拎嚟煮飯食喇。

#菇菇

#滴淚白環蘑

#企鵝散步見聞

#眈天望地