抬頭望望字牌

鵝散步時一向鐘意眈天望地，行到勿地臣街時，突然見到唐樓外牆有字牌「港九煙草業職工總會」，字型幾特別喎！等鵝去查個究竟～

(๑´ڡ`๑)

經過鵝四圍打聽，喺鵝友兼平面及小誌設計師劉志威嘅報料下，估計呢個字牌嘅字型係方正姚體。翻查資料，方正姚體由刻字工人姚志良創作，以宋體為基礎，將方形字體改成長方形字體，揉合楷體、仿宋同埋黑體嘅特色而成。姚體最早喺1958年首先喺《解放日報》上使用，之後成為當時中文報章標題字體嘅其中一個熱門選擇。

至於呢個職工總會嘅辦事處，就已經搬咗去灣仔嘅商業大廈啦。戰後唐樓部分可以容許商住兩用，為咗吸引行人注意，會直接將寫有舖頭名嘅字牌整喺樓宇外牆上，方便「多角度」都睇得清楚，充滿時代感！

其實除咗銅鑼灣，香港其他舊區樓宇外牆都有唔同特色嘅字牌，鵝友記得出街都要眈天望地留意吓啦～

#企鵝散步見聞

#銅鑼灣字牌