司徒惠與銅鑼灣

嘎！鵝今日想同大家分享下一位香港建築界嘅傳奇人物，同埋佢喺銅鑼灣嘅經典建築作品！

(✧≖‿ゝ≖)

企喺希慎道同禮頓道交界抬頭一望，呢座「希慎道壹號」，有別於周邊其他大樓嘅設計，一道道六角形窗框超顯眼！呢座大樓係由著名嘅司徒惠建築師事務所負責設計，並由甘洺建築師事務所負責統籌。

講起司徒惠，佢自 50 年代起已經係香港極具影響力嘅建築師同工程師！佢年輕時喺上海聖約翰大學畢業，之後去過倫敦、格拉斯哥等地深造，考取咗各種工程相關嘅專業資格。佢身兼土木工程師、機械工程師、結構工程師同公共衞生工程師等多重身分 （好勁呢～～）後來佢喺香港成立事務所，仲喺 1960 年出任香港建築師公會（現香港建築師學會）會長，為呢座城市留下無數經典作品，直到 1985 年退休先移居美國。

鵝發現佢嘅風格有好有趣嘅轉變。50 至 60 年代，佢主打實用為本、規劃井然嘅現代主義風格。循道衞理聯合教會九龍堂（1951 年）、部分舊蘇屋邨（1961 年）、舊明華大廈（1962 年）呢啲好親民嘅地方，都係佢嘅作品。到 1960 年代中後期，佢開始嘗試粗獷主義風格，大量使用裸露嘅混凝土、生鐵同磚石，呈現出強烈嘅幾何線條同厚重感。例子有長沙灣嘅旅港開平商會學校（1965 年），將大樑大柱直接外露。又例如循道衞理聯合教會北角堂（1966 年）嘅屋頂，就摺疊成獨特風琴形狀，由兩邊六角形支柱連成嘅八個結構框架所支撐。

呢啲探索，亦為佢後來規劃香港中文大學嘅校園設計奠定咗基礎。校園揉合咗現代主義風格嘅樸實無華，以及粗獷主義風格，特別多採用未經雕琢、保留原始質感嘅清水混凝土建築，配合校園嘅花草樹木，營造出同大自然融為一體嘅氛圍。

(ㆆᴗㆆ)

講返1976 年落成嘅希慎道壹號，佢係一棟 26 層高嘅現代主義辦公大樓，起喺三條繁忙街道交界嘅不規則地基之上。大樓最招牌嘅六角形窗框係用混凝土做嘅，可以幫入面嘅辦公室遮陽。基座嘅閣樓同一樓以前亦用過垂直六角形立面，仲鋪咗白色玻璃馬賽克磚添。可惜，大樓後來改建咗基座外牆，家陣冇得睇喇⋯⋯

除咗希慎道壹號，司徒惠喺銅鑼灣仲有過一座極具代表性嘅作品——興利中心！呢座曾經位於軒尼詩道 500 號、樓高 41 層嘅地標，喺 1981 年落成。佢同樣係現代主義風格，主要由筆直、剛硬嘅線條構成，呈現典型嘅方形塔樓（Tower）配低座商場（Podium）組合。外牆採用咗當年超流行嘅深色防曬玻璃窗，搭配淡色調嘅牆面，視覺上內斂又穩重，而低座商場內部設有寬敞嘅中庭。興利中心同時仲係一代香港人經典嘅約會地標，見證咗日資百貨喺香港嘅黃金時代㗎～

2006 年興利中心拆卸，原址重建成 2012 年開幕嘅希慎廣場，至今依然係銅鑼灣嘅商業地標。雖然希慎道壹號嘅基座已經改建，但大廈整體都好可觀。下次鵝友行經希慎道時，不妨抬頭睇一睇，欣賞吓司徒惠為呢個社區留低嘅文化築跡！