銅鑼灣食水賣水站

前幾日夏至，鵝睇完日落之後，沿住海旁往天后方向繼續行。行行吓，見到一座被鐵欄同綠色植物包圍嘅方形小屋，上面掛住塊閃令令嘅牌：「銅鑼灣食水賣水站」。

後生嘅鵝友可能會問：「食水賣水站？打開水龍頭就有水啦，點解仲要用『賣』嘅？」呢座由水務署設置嘅屋仔，多年嚟一直默默背負住重任，專門為海上面嘅船隻提供清涼嘅生活食水。

全港一共有七個食水售賣站，分布喺銅鑼灣、西灣河、西區、筲箕灣、荔枝角、油麻地、同屯門。七個賣水站入面，以銅鑼灣食水售賣站嘅歷史最悠久，喺1965年就啟用喇。以前買水嘅手續比較複雜，漁民同艇戶需要先到水務署嘅客戶諮詢中心，或者海事分處購買實體水票，然後先可以去岸邊嘅「食水售賣站」換取食水。依家除咗可以預先買「水票」，仲可以直接喺賣水站「嗶」八達通畀錢，即買即拎，方便好多呢！

(* ´ㅁ`*)

講返歷史，上世紀六、七十年代嘅避風塘，住滿晒「住家艇」嘅水上人。以前喺艇上煮飯、沖涼都要用淡水，淡水對佢哋嚟講係彌足珍貴，所以當時水上人會將買淡水叫做「上水」。因為咁，嗰陣仲衍生出「水艇」呢個行業，好似海上流動便利店咁，先喺岸邊買水，再去各家各戶艇邊跳錶收費，真係名副其實嘅「水為財」！甚至有啲勤力嘅艇戶會自己划船去岸邊賣水站攞水，呢個方式到咗依家仲沿用緊。

時至今日，雖然住家艇已經差唔多絕跡，但每逢夏天「遊船河」旺季，賣水站依然好熱鬧。事關賣水站通常喺淺水區，大船根本唔會過去，加上就算排隊都要排到天荒地老。呢個時候，「水艇」就大派用場喇！雖然搵水艇買水收費會貴少少，但勝在隨叫隨到，直接送上門，幫大船慳返排隊嘅時間，所以海上便利店嘅生意依舊好好㗎。

下次大家去銅鑼灣海旁散步吹海風，不妨留意下呢座方形小屋，了解呢個默默支撐住海上生活嘅設施。

٩(ˊᗜˋ*)و