WEEDsilience 的三位鵝友

鵝早排跟住鵝友 WEEDsilience 調查小組喺銅鑼灣做野草調查。雖然佢哋三個都姓王，又鍾意植物，但佢哋之間係冇血緣關係㗎！再講性情都唔同，各有所長～

ദ്ദി (⩌ᴗ⩌ ) /

王曉欣（Ivy）同王顥霖（Homan）都係「WEEDsilience」同「Pi Lab Limited」創辦人。點解佢哋一路拍住上呢？不得不提，係同佢哋個名都有啲關連㗎喎。Homan同Ivy係大學同學，咁啱佢哋個名嘅縮寫分別係WHL同WHY，所以讀書期間被編排做lab mates，自此熟絡。

Ivy喺香港中文大學環境科學系一級榮譽畢業，之後曾經擔任植物標本館科研統籌，係《 香港原生植物圖鑑 》系列嘅作者（喺鵝屋企打書釘都有得睇㗎！），當時嘅工作包括科學繪圖、花粉研究等。目前，佢專注於研究自發植物、生態設計，亦從事標本製作同教育。喺做調查嘅過程中，Ivy係帶路嘅GPS，又會拍低發現野草嘅周圍環境。同時，佢都係團隊入面嘅溝通橋樑，例如考察前細心地get到Homan同Mercury講嘅等候地點有出入，避免大家擺烏龍。

Homan係香港大學環境管理理學碩士，而家主力記錄同研究本地野草，同時為其他機構帶領環境教育、培訓同生態調查 活動。做調查嗰時，Homan 負責揸住紙筆，記低野草嘅物種名同生境。鵝拋咗好多無厘頭嘅問題，Homan都能夠一一接波，好有耐性。佢最鍾意踎喺田，或者草叢入面，睇吓昆蟲、其他動物，同植物之間嘅互動，包括但不限於走嚟走去、採花蜜、玩、食植物，互相食對方⋯⋯一睇就一整日，好專注，自得其樂。

王韶昀（Mercury）現任職「大地予我」的稻米記錄主任，正進行本地稻米復育 研究，都係「Pi Lab Limited」同「WEEDsilience」嘅研究夥伴。Mercury人稱「行走嘅植物百科全書」，辨認野草超級快。不過，鵝印象最深刻嘅，反而係令Mercury猶有餘悸、聞風喪膽嘅 #蒺藜草。話說佢有次舉辦禾本科野草嘅工作坊，介紹咗呢種草，而蒺藜草穎果嘅外殼係生滿剛硬刺毛嘅。「蒺藜草」呢個名，同埋古代暗器兼障礙物「鐵蒺藜」，都係源自蒺藜科嘅蒺藜。鵝覺得好似讀急口令咁⋯⋯當時，Mercury冇為意有幾粒蒺藜草嘅果灑咗喺凳上，放鬆個人嗰陣，一嘢坐咗落去——細、硬又尖嘅針拮晒入pat pat入面，痛死！睇佢示範坐落去嗰吓，面容扭曲，搞到鵝都痛埋一份。原來除咗研究植物，Mercury仲有埋表演天賦呢。

♡꒰´꒳`∗꒱

同佢哋學認野草，鵝很高興～