鵝都有個舞台夢

上星期日黃昏之後，鵝沿怡和街行去記利佐治街，耳邊傳來節奏好強勁既音樂 ── take your shot Photoshoot～Pop pop pop ～鵝忍唔住跟節奏郁，仔細聽，係鵝聽唔明嘅韓文歌！

(´◉⊖◉`)

原來又有舞團喺銅鑼灣鬧市跳街舞拍MV啦，鵝餓住肚都要湊熱鬧睇咗陣。佢哋喺舊年年底新成立嘅本地舞團DIVA ，一行5人，播住韓團Allday Project嘅曲目Wicked，跳起節拍強勁嘅Kpop。同其他舞團一樣，佢哋平日不定時會係香港街頭跳Kpop，同時邀請攝影師幫忙拍攝，之後剪輯成音樂短片放上網。

舞團團長Venus話，世界各地翻唱Kpop嘅舞團，會喺各自嘅社區搵一個具有代表性嘅位置，可以喺街道、廣場或者其他公共空場，慢慢聚集越來越多本地舞團去拍片。佢覺得，香港嘅話就係銅鑼灣。

ε=ε=(っ*･⊖･)っ

鵝唔識跳舞，但鐘意欣賞表演，有時間就會喺街頭湊吓熱鬧，而鵝早幾個月認識咗同樣活躍於銅鑼灣街頭嘅另一隊舞團 ── Ace of Special (ASP3C) 。佢哋一行5人，表演當晚著住自製嘅波衫，成身閃令令，企喺行人專用區到忘我跳舞、拍片，就算天氣又熱又翳焗，都完全無受影響，勁enjoiy！

街坊駐足觀看，途經嘅路人不時舉機影低呢個「鬧市奇景」，亦有專程嚟到拍攝嘅攝影師～咦？鵝屈「掌」一數，現場有10幾部相機影住佢哋呢～

ASP3C成員Jing話，每次係社交平台預告會嚟銅鑼灣跳舞時，就會自自然然匯聚到一班同好，而團員跳街舞已經超過 5 年，跳勻港九新界，最鐘意嘅地點仍然喺銅鑼灣。

咁啱嘅，鵝都好喜歡銅鑼灣呢～

(´✪ ⊖ ✪`)⊹₊⟡⋆˚⊹

不過每日生活嘅地方，反倒覺得平常，細心望下，原來鏡頭下嘅銅鑼灣街頭充滿魅力。就好似街舞團體集中嘅記利佐治街，街道又長又窄，入夜後，左右兩旁沿路嘅商店燈箱亮起，望向怡和街時，大型商場同舊式大樓互相穿插，巴士、電車駛過嘅獨特香港面貌，繁華鬧市一覽無遺。

且跳且珍惜，Jing繼續話，「而家香港地方可以跳舞嘅地方，又要地方夠大又唔趕，其實都係得返銅鑼灣呢個位。」根據佢哋之前嘅經驗，只要聲量合理、跳舞時間唔好太夜，銅鑼灣的確係「舞團友善」。而文章開首提到嘅舞團DIVA都有類似見解，大家都對呢個公共空間珍而重之。

(◔⊖◔)つ

「你哋下次幾時嚟啊？鵝要繼續搵你哋玩！」ASP3C幾位成員就話，其實佢哋都係平時放工之後約出嚟練舞，練完先去街頭正式拍攝，話唔埋呢～叫鵝睇緣份～

正正係呢種偶然，透過佢哋嘅表演，將銅鑼灣呢個地方同埋街坊串連一齊，行行企企，或是隨歌搖擺身體，竟然編成一隻隨興偶然嘅舞步。