鵝爸極限孵蛋
- 銅鑼灣企鵝
- 7月9日
- 讀畢需時 1 分鐘
聽日係父親節，鵝趁呢個機會同大家分享鵝爸點樣不可思議地照顧企鵝蛋～
(*´∀`)~
懷孕嘅企鵝媽媽產下一粒梨形嘅蛋之後，為咗喺嚴寒下補充足夠能量，會拿拿聲將蛋交畀爸爸照顧，然後長途跋涉去海入面搵嘢食！跟住落嚟嘅幾個月，爸爸負責孵蛋呢個重大任務啦！佢會將蛋穩穩地擺喺自己對腳上面，再用腹部皮膚形成嘅囊袋（又稱育兒袋）包住粒蛋，抵擋住南極強勁嘅風雪。呢 4 個月，鵝爸係完全冇嘢食嘅～吃驚～
(°ﾛ°٥)
佢哋全靠自己之前儲落嘅脂肪頂住亦因為咁，孵蛋期間嘅體重會直接跌一半（絕食唔鼓勵啊！）。千辛萬苦成功孵到企鵝 BB 出嚟時，企鵝媽媽就會喺呢個時間，辦認鵝群中爸爸嘅叫聲，一家團聚，仲帶住滿滿嘅「海鮮餐」餵 BB 第一餐，父母之後會齊齊上陣，一齊餵養新生小寶寶，照顧到佢大大隻隻可以自立。
(♡˙︶˙♡)
無論身處家庭咩崗位，鵝都想多謝鵝爸爸辛苦照顧鵝 B，祝咁多位鵝友父親節快樂！
留言