蓮霧結果前
- 銅鑼灣企鵝
- 6月5日
- 讀畢需時 1 分鐘
鵝友神神祕祕咁話，#希慎道 有種樹開咗兩個形態嘅花，一大一細，想拉鵝齊齊研究。
(๑•̀ω•́)ノ(⊙v⊙)！
咁搞笑？鵝頭霧水，跟去望望先。咦！係之前寫過嘅 #蓮霧 喎！而家初夏，佢哋有啲仲開緊花，花蕊奔放四射。喺樹下抬頭睇，好似一朵朵淡黃色嘅煙花呢。
ヽ(✿▽✿)ノ
令鵝友疑惑嘅「另一種花」，實情係蓮霧花嘅托筒同子房，係開完花，甩晒花瓣同花蕊嘅模樣。
所謂甩淨嘅四片花萼似朵小花，又咁啱同花蕊、花瓣同色，所以先會有呢個錯覺。鵝就覺得十足十插蛋糕嗰啲蠟燭托。之後花萼會逐漸收合包覆，子房發育，再過多個月，就變成一粒粒紅卜卜、的骰嘅鐺鐺喇～
蓮霧食就食得多，觀察吓佢結果前嘅過渡期，又幾新鮮啵。
コメント