渠蓋上嘅銅鑼灣

上星期，鵝喺維園噴水池入口附近，發現地下有幾個五顏六色嘅「銅鑼灣」渠蓋！

( ºωº ) ノ

畫咗啲咩呢？由上至下、左至右睇，鵝認得大球場、中央圖書館、維園泳池，近海嘅有百德新街住宅群，同個頂尖尖哋嘅信和廣場。

原來由 2023 年起，路政署開展咗一系列美化街景嘅工程，喺尖沙咀天星碼頭、青山公路深井段、天水圍濕地公園等地方，換上顯示到地區特色嘅圖案渠蓋。鵝見到濕地公園搵咗黑臉琵鷺做代表，荃灣路德圍就有紅耳鵯，都有啲羨慕其他雀雀⋯⋯

不過，銅鑼灣個渠蓋都好靚！用咗喺避風塘鳥瞰陸地嘅風景：有維園同維港做前景，中景係最繁華嘅商業區，背景係渣甸山。有山有水有大廈，好豐富～

(≧∀≦)ノ

鵝考考大家，喺渠蓋最右面嘅、好似朱古力咁一格格嘅建築物，各位又知唔知係咩嚟㗎呢？