沙田有個銅鑼灣

有次鵝約鵝友去銅鑼灣散步，點知企咗成個下午都不見鵝影！一問之下，原來佢盲舂舂去咗沙田大圍嘅銅鑼灣！

（´･Д･??）

竟然有啲咁嘅事！身為一隻見過世面嘅銅鑼灣企鵝，鵝決定親自去一轉大圍，睇吓呢個「銅鑼灣」分身究竟係何方神聖！

根據馬鞍山民康促進會資料記載，大圍銅鑼灣村嘅村民，原本住喺「担杆莆」，即係現今沙田希爾頓中心一帶) ，十九世紀末，因為興建九廣鐵路而需要搬村。新村落嘅地形橫看豎看都似一個銅鑼，所以最初叫做「銅鑼場」。但當時嘅華民政務司嫌個「場」字太市井，唔多似住宅區，於是大筆一揮改名叫「銅鑼灣」。

港島嘅銅鑼灣（Causeway Bay）係名店林立、逼到羽毛都甩嘅石屎森林；大圍呢個銅鑼灣村（Tung Lo Wan Village）偏偏就喺高架天橋底自成一角。鵝由大圍站出發，搖搖擺擺行咗大約 20 分鐘就到達銅鑼灣村公所。抬頭一望，村屋全部依山而建，與一級級樓梯同斜路互相交織。村裏面綠影婆娑，種滿果樹，一路行一路聽住雀仔嘅叫聲，有種瞬間遠離煩囂都市嘅感覺。

另一個有趣嘅發現，係喺銅鑼灣村附近、沙田通往城門隧道嗰條巨型高架天橋底，收埋咗兩個隱密嘅空間：銅鑼灣遊樂場及銅鑼灣籃球場！球場上有高架橋遮擋，就算外面風大雨大或烈日當空，都無阻波友轉身射個三分波。球場另一邊仲擺咗兩張乒乓球檯，唔少村民喺度搓波，樂也融融，搞到鵝都想搓埋一份，果然係一個聚腳好地方。

鵝覺得，其實舊時啲人嘅想像力都幾豐富，鍾意用日常家用器具去形容地形地貌。除咗銅鑼灣，筲箕灣就因為原始海灣地形貌似個大筲箕，大埔碗窰則以盛產青花瓷碗及陶瓷器皿而得名，都係結合生活與地方命名嘅例子。

(｡･ω･｡)ψ

除咗「銅鑼灣」個名撞到應一應，鵝友知唔知香港仲有邊啲地方係撞名呢？快啲留言話畀鵝知啦！