保良局入面嘅花園

喺七月尾，鵝同鵝友去咗保良局歷史博物館，一踏入保良局範圍就見到保良花園。鍾意逛公園嘅鵝，心思思想知道多啲呢到嘅事。

保良花園位於行車牌樓斜坡嘅左邊，係留局兒童嘅休憩空間，平時唔對外開放㗎～

٩( ᐛ )و ♡

睇返1960年代末、1970年代初嘅保良花園及遊樂場舊照，當時嘅遊樂場，喺光禿禿嘅水泥地上，設有立方體馬騮架、蹺蹺板、滑梯、鞦韆、氹氹轉。樣樣都好好玩咁！

尤其係條滑梯，睇相都覺得幾高同埋斜。鵝睇到心心眼，因為喺上面瀡落嚟，實好刺激——不過而家就換咗啲安全嘅遊具，兼加返地墊喇。

(● ˃̶͈̀ロ˂̶͈́)੭ꠥ⁾⁾

另外，一開頭嘅保良局平面圖，標記咗門內近圍牆嘅一列樹，真係寫住「樹樹樹樹」！時日過去，得返兩棵大榕樹留喺原地。數數鵝趾，佢哋超過90歲喇～鵝今次有幸參觀保良花園，都特別有去摸摸佢哋呢。

除咗花園，鵝當日仲同鵝友參觀咗中座大樓入面嘅展廳，了解咗當年留局婦孺嘅生活。好多謝文物博物館特別安排，等鵝睇返好多保良局嘅舊相同舊文件，例如有工程圖則、《領婚領育簿》、《口供簿》、同華民政務司嘅往來書信等，非常豐富。鵝遲時會寫文介紹吓多啲保良局故事，鵝友記得留意啦！

喺呢到特別嗚謝保良局歷史博物館提供珍貴嘅歷史相片畀鵝分享！