總統戲院

今日銅鑼灣好熱鬧，除咗因為 #姜誕 ，亦有唔少人因為告別 #總統戲院  而來。鵝喺銅鑼灣咁多年，睇住總統戲院喺1966年開業，到今年已經58年喇。

鵝呢兩日都貢咗過去戲院門口睇吓。今日最後兩場戲分別係荷里活電影 #特技狂人 & 港產片 #超意神探 ， 前者 7:25 開場，後者 7:35開場，但《特技狂人》片長過《超意神探》，所以今日最後一齣喺總統戲院散場嘅電影，應該係《特技狂人》嘞。

5點幾時，呢兩場戲嘅飛都幾乎賣晒，只剩第一排幾個位。

現場有唔少人影相留念。有位麥先生話，從銅鑼灣搬走後，尋日特登返嚟影相。佢話60年代尾、70年代，佢喺公理堂小學讀書，經常放學自己嚟睇戲。以前6毫子、8毫子一張飛，仲有分前座、中座、後座同樓上嘅超等。

話說舊時90年代嘅戲院有啲專門放映「唐片」，有啲放映「西片」。上「唐片」的戲院外，賣煨魷魚、甘蔗、炒栗子，離遠就聞到；「西片」嘅就當然賣爆谷、熱狗、汽水，而當日總統戲院就專播「西片」～

鵝偏愛開喺街口嘅戲院。總統戲院屬 #新寶院線 ，而佢旗下戲院全部都係單幢式，包括現存位於旺角嘅 #新寶戲院 ，同埋喺屯門嘅 #凱都戲院 。麥先生話以前總統戲院好大，全影院總座位達1,200，重建後嘅規模細好多，現時就只剩428個位。鵝見佢攞住電話影咗好耐，仲買咗結業日嘅戲飛留念，似乎好唔捨得⋯⋯