top of page

南華會申請破例延期



原定今日 #城規會 咪審議批唔批准南華會興建 #電競館 嘅申請嘅,殊不知, #南華會 竟然向城規會申請第三次延期,理由係需時回應 #運輸署 對於電競館會導致交通擠塞嘅憂慮,以及對於連接南華會同希慎新項目行人天橋嘅意見。


企鵝用「竟然」呢兩隻字,係因為按照城規會指引,一般申請只可延期兩次,惟有喺非常特殊及有充分理據嘅情況下,城規會至可以考慮破例延期。


俾返少少時序概念大家。南華會係喺上年3月底向城規會提出興建電競館,當時嘅設計成個 #石棺 咁(新年流流大吉利事!),令好多街坊擔心有礙觀瞻,亦憂慮可能加劇塞車、噪音等,多個政府部門亦提出唔同意見。然後,南華會喺5月同10月兩度申請延期,理由係需時回應種種意見,包括提交更多評估報告,外觀設計亦修改成 #崩口碗(百無禁忌!)。


期間南華會都好積極,喺7月、8月、10月、12月同上個月五度提交補充資料。不過,呢五次補交資料,都無法釋除疑慮,原定今日(2月3日)審議,運輸署喺星期一(1月30日)再次提出意見,南華會於是就喺星期二(1月31日)去信城規會,要求破例第三次延期。


2月1日嘅《明報》有篇報導好值得留意。題為〈自評交通影響局部超標 南華會續申建電競館〉嘅報導指出,南華會向城規會提交嘅交通影響評估中,一旦電競館落成,「部分銅鑼灣區內路段平日的交通剩餘容量減至9%,低於運輸署一般可接受標準(15%)」。


報導內亦解釋,「按運輸署標準,若路口剩餘容量大於15%,即代表有足夠容量;小於15%,即路口開始飽和」。


即係話,電競館落成嘅話,銅鑼灣會更塞車!


呢一點仲要係南華會自己話俾城規會知嘅,好趣致⋯⋯


南華會呢輪申請延期,除咗要自圓其說,拆解呢個自揭嘅交通困局,另外,南華會亦話希望可以喺「後疫情」時代重新評估交通流量。


以上資料全部都係 #公開資料 來㗎,既然係眾人之事,鼓勵大家都留意下:


城規會 

規劃申請 A/H7/182


城規會

都會規劃小組委員會

第712次會議 議程


城規會 

都會規劃小組委員會

第712次會議 決定摘要


順帶一提,企鵝喺上一個post咪提到南華會現有嘅 #電競訓練中心 長期好靜焗嘅,依家又擔心電競館落成可能導致嚴重塞車,唔通鵝自相矛盾?人少又話人拍烏蠅,人多又怕交通擠塞,真係一隻奄尖聲悶嘅鵝?


非也非也,查實係咁,家陣個場靜過鬼係事實,大家有興趣自己去睇睇,企鵝最鼓勵親身求證㗎喇。未來交通擠塞,係南華會自己交嗰份交通影響評估講嘅。


鵝只係懷疑,嗰度係咪真係適合起座巨型電競館。電競館有咁大需求咩?嗰塊地會唔會有更好嘅用途?


鵝始終希望,#銅鑼灣 成為一個大家都enjoy,可以輕鬆散步散心嘅地方。「大家」嘅意思係,除咗人類,亦包括貓狗牛野豬馬騮雀仔珠頸斑鳩小葵花鳳頭鸚鵡⋯⋯唔同嘅植物(有排數,從略,鵝自知長氣)亦可以好好生長。


如果有足夠嘅空間,鵝哋生活得方便嘅同時,眾生亦和諧共存,咁就好喇。


企鵝會繼續留意事態發展。


bottom of page