鵝們的電車上
5天前
讀畢需時 2 分鐘
作為一隻銅鑼灣企鵝，要出遠門時，鵝都鍾意搭叮叮，慢慢搖出銅鑼灣，去港島其他地方捐窿捐罅～
鵝從中央圖書館出發，坐叮叮沿高士威道轉入怡和街時，抬頭就見到淡粉色嘅圓形天橋；當經過軒尼詩道兩旁人來人往嘅崇光百貨同希慎廣場後，好快就去到鵝頸橋啦......鵝跟住叮叮左右搖啊搖，諗起一首都成十幾年前嘅歌。
◖| ˘ω˘ |◗♪♫
「看這銅鑼灣璀璨／每天依然如常出發／這一秒有如騎着天馬／樂在其中都好嘛」
睇到歌詞，可能都有鵝友識得唱。
冇錯，就係C AllStar嘅《我們的電車上》啦！
《我們的電車上》係C AllStar早期出道嘅作品，亦係出自填詞人鍾晴嘅手筆之作。
呢首歌藉着搭叮叮時嘅沿途風光，感歎時代更迭嘅同時，亦向身邊愛人承諾無論世界點變，都要「沿路下半生與你坐着笑」。真係好鬼sweet啫～
首歌好聽之餘，個MV都好有意思㗎！就好似一個時間囊咁，留低咗17年前嘅銅鑼灣風景。
譬如仲未安裝大屏幕嘅崇光百貨啦，又見到波斯富街嗰間唔少老街坊都幫襯過嘅「新時代美食」啦，仲有時代廣場嘅鐘樓添呀！好懷念呢～
而且睇返以前嘅訪問，仲畀鵝發現一個彩蛋添！
原來鍾晴填《我們的電車上》呢首詞嘅時候，個人仲遠在新西蘭，所以只能夠憑住網上資料同自己以前搭電車嘅記憶去填詞呢。
鵝表示十分震驚，同時亦十分佩服鍾晴嘅填詞實力，唔單止觀察入微，又能夠好巧妙地將沿途景色同地名寫入歌中，淨係聽歌都好似返咗轉香港咁呀！
如果身在他鄉又掛住港島風景嘅話，鵝誠意推介呢首C AllStar嘅《我們的電車上》呢～ ♪
(˘ ᗜ ˘)〜♪
《我們的電車上》（2009年）
主唱：陳健安@C ALLSTAR
作曲：甯浩基@sense
填詞：鍾晴
編曲：賴映彤@groovision
監製：簡@groovision
留言