劉師傅的退休放船生活

5月4日
讀畢需時 4 分鐘

相信好多鵝友同銅鑼灣街坊都知道，維多利亞公園有個模型船池。

但係大家又知唔知道，呢個池亦係全香港第一個模型船池呢？

翻查舊報紙《華僑日報》，原來維園模型船池喺1960年12月24號平安夜正式啟用。第一日開，已經吸引咗好多小朋友去玩！

幸得鵝友介紹，鵝搵到一位維園船友，同佢傾傾偈。於是乎，喺四月某個風和日麗嘅上午，鵝約咗劉祉鋒（Edwin）呢位資深船友，一路放船，一路吹水。

୧(•̀ө•́)୨

可能有啲眼尖嘅鵝友認得Edwin，覺得佢好熟口熟面。都唔出奇呢！因為佢以前都成日上新聞、上電視㗎！

Edwin其實係環保團體「綠惜地球」嘅創辦人，亦係前總幹事。1989年入行，去到上年9月退休。佢曾經出任連續三屆環境諮詢委員會成員，以非官方專家身份，向政府提供有關環保政策嘅意見，係環保界嘅大前輩呢！

今年68歲嘅Edwin，退休後放慢咗步伐，重新調整生活節奏。

其中一個最明顯嘅變化，就係Edwin多咗時間到維園模型船池放船！

「要評估一架模型船舊唔舊，係要睇船嘅底部。」

Edwin翻轉一架白色嘅模型小船俾鵝睇。白色嘅船底有幾條刮痕，亦揩咗些許第二架船嘅顏料喺船頭嘅位置。有啲係撞到其他模型船，或者隻船轉唔切彎，而撞落池底。

鵝問：「咁玩慢船咪唔會撞花囉？」

Edwin立刻興起，露出一個有幾分童真，又有少少調皮嘅笑容：「但係我就係鍾意快船夠刺激！」

話口未完，Edwin將船拋入池中，攞起遙控——架船「𠽌」一聲就劃過水面，激起一道白色水花。計好時機，掟個靚彎！小船險險避開池邊，繼續高速向前「飛」。

Edwin一路控制住行得飛快嘅小船，一邊同鵝解釋玩快船嘅竅門：「記住唔可以一味快，太快、馬力太大，就容易失控翻船。」

「有時船尾嘅水刀會棘到樹葉，呢個時候只要慢慢回返架船就得㗎啦。」Edwin一手撩開啲樹葉，架船又再一支箭咁飆出去。

小船不斷沿著池邊兜圈，摩打聲同水花濺起嘅聲音互相交疊，引來好多街坊同小朋友駐足欣賞。飛完幾圈，有小朋友高興拍手，抑或悄悄企埋池邊，等待模型船濺起嘅水花灑濕自己。

「玩船就好似一個表演咁，大大細細都圍住睇。小朋友開心，我又開心。」

(´•᎑•`)

Edwin 以前住灣仔嗰頭，大約5、6歲時，最鍾意同阿哥到維園放船玩。「細個冇乜錢，就同阿哥一齊放一艘小小嘅船。」Edwin阿哥由池對面推過嚟，佢再推返架船過去。全人手推動，自得其樂。

一聽到摩打聲，就知道同場有人放緊架當時非常新潮、入電芯嘅模型船！Edwin會同阿哥企喺側邊睇，齋睇都開心到唔願返屋企。

呢場放船遊戲，Edwin一玩就玩咗60年有多。

退休之後，Edwin每日食完早餐之後就會到維園散步。每逢星期六、日就會嚟放船。佢亦因為咁而認識咗一班船友，大家得閒就夾時間飛船鬥快。

正所謂「一次生，兩次熟」。漸漸地，無論係老朋友定係新手，抑或是第一次放模型船玩嘅小朋友，都叫Edwin一聲「劉師傅」。

點解係劉師傅呢？原來Edwin不單止識玩船，仲識得砌船同整船㗎！

事緣有次船友嘅大船零件燒壞咗，正愁如何處置架船嘅時候，Edwin就提議可以幫手改裝，改咗之後仲可以行得快過原先添！

個位船友情不自禁叫咗聲「劉師傅」，於是Edwin就開始幫助其他船友check零件、整吓船咁樣。而Edwin自己嘅船，由個餡到外部嘅加工，都係手工DIY砌出嚟的呢！

「由零開始砌起，都係玩船嘅樂趣之一。」Edwin喺衫袋攞出一塊舊嘅純棉手巾仔，擦乾船身之後，拆開埋船殼，興致勃勃咁同鵝講「砌船之道」。

「好多新手砌船嘅時候，會忽略咗整架船嘅重心。唔係夠快就得，保持平衡好重要㗎！」

砌船，原來係非常之考驗船友對於物理學嘅理解。船身長度、重量，都會影響條數點計㗎。電池擺前擺後，會影響重心。而喺船嘅pat pat加塊壓水板，就可以調整重心，防止船向前舂。喺船嘅尖端包上橡膠，就可以防撞。船身左右兩側黏上水線，就可以穩定船隻，令佢唔會左右飄忽。喺壓水板兩側嘅水刀，就係玩快船嘅重點部份——砌得好嘅話，水刀喺架船高速轉彎時就會插入水中，產生阻力，就唔會翻船喇～