企鵝嘅精神老祖宗《 #莊子 》書入面有個故仔，相信考過A-level中國文學科，或2018年後DSE中文科嘅朋友都讀過，講某日惠子又同莊子鬥嘴，惠子話自己有棵樹，叫做樗，大大棵但岩岩巉巉，歪來歪斜，即使生喺路中央，木匠亦眼尾都唔睄吓，意味呢棵樹實屬廢柴，無法用來做傢俱、樑柱或船隻，大而無用，一如莊子講嘅嘢咁趕客！
莊子就話喇（大概得戚地），你有棵大樹，使乜擔心無用呢？何不將棵樹種喺nowhere，然後好逍遙咁喺樹底躺平？既然棵樹無埞用得著，你亦唔使擔心棵樹俾人斬咗冇埞hea啦！
兜一大個圈，鵝其實想講，銅鑼灣路中心都有個類似樗樹嘅物體，就係怡和街尾嘅圓形天橋。有人嫌佢樣衰阻碇廢，亦有人（或鵝），十分享受喺橋上散步、吹風、睇樹、睇雀、睇電車、睇人潮。
甚至可以話，喺企鵝心目中，#圓形天橋 係銅鑼灣最iconic嘅地標，係銅鑼灣嘅大門口。
然後間唔中，當好多嘢都被拆走被消失，無論因為安全或任何理由，企鵝會擔心，話唔埋有人圓形天橋都會消失，咁就弊傢伙。喺噩夢成真前，鵝想好好認識圓形天橋，勢估唔到竟然踏上一段不斷撞牆嘅fact-check馬拉松，發現一籃子錯誤資訊。熱愛fact-check如鵝，也check到懷疑鵝生……
以下指出現存資料錯誤處，僅為訂正，無意冒犯，亦唔係搵交嗌或撩交打啊！
（頭盔mode完畢。）
（終於入正題。）
【無名嘅橋】
「圓形天橋」其實無名㗎。公道啲講，其實香港所有 #行人天橋 都無名。喺政府記錄中，行人天橋只有編號，由 #路政署 編排。而圓形天橋嘅編號就係HF85，當中H代表港島，F代表行人橋Footbridge，85就代表佢係港島約200條行人天橋中，第85條落成嘅，咁啱又喺1985年落成。
喺區議會文件中，HF85有個好長嘅名：怡和街、邊寧頓街及糖街交界行人天橋——直情長到好似啲西餐廳menu上嘅餐點名稱咁——如實咁交代天橋所在位置。亦有人叫佢做 #環形天橋 、 #M字橋 或 #怡和街天橋 ，不過無論用邊一個名，或者官方編號，喺Google Map上都搜尋唔到，要搵到怡和街、邊寧頓街及糖街交界，至會見到地圖上示意路面結構嘅硬線。
可能亦因為咁，好少人會相約喺圓形天橋碰面。Google Map都goo唔到嘅！
【影視作品取景地】
條橋依家少人行，但從前唔是咁的。
圓形天橋曾經係橫跨 #怡和街 嘅主要過路處，想當年企鵝逛完 #大丸 途經 #百德新街 ，要過怡和街M記食魚柳包嘅話，就一定要行上圓形天橋（或跨欄亂過馬路，但安全至上兼腳短嘅鵝從來唔會咁做）。M記對開嘅斑馬線 & 交通燈，喺2002年至有㗎。自此圓形天橋就冷清咗好多。
不過，冷清有冷清嘅好，醒目易認但少人用，令佢成為唔少影視作品嘅取景地。企鵝最鍾意 #岑寧兒 《 #風的形狀 》MV中嘅圓形天橋。MV中1分29秒起，唱完「儘管會不安」嗰吓，間奏時就出現岑寧兒企喺橋下路中心嘅畫面，鏡頭圍住岑寧兒公轉一周，直到「亦有些迷失 不能名狀」兩句為止，都見到圓形天橋，近鏡遠鏡交錯，非常dreamy。
此外，仲有AK《信之卷》MV、李克勤《深深深》MV，仲有港產片《 #戀情告急 》 梁詠琪發古天樂脾氣：「我唔要情人節食58蚊任食火鍋！」嗰度，同埋荷里活科幻電影《 #攻殼機動隊 》其中一個打到乒鈴嘭唥嘅地方。
網上流傳橫掃九十年代嘅《 #古惑仔 》系列電影，亦曾經喺圓形天橋取景。
為咗證實呢一點，企鵝睇晒全系列六集《古惑仔》，再睇埋《少年激鬥篇》，都完！全！搵！唔！到！
如果大家搵到係邊一齣邊一幕，請話俾鵝知。
（順帶一提，企鵝都研究咗電影中嘅銅鑼灣渣fit人，有唔少有趣發現，以後再分享。）
【設計師之謎】
呢個謎最難解，費盡鵝九牛二虎之力（係，總共三種動物嘅力）至解到。
唔少資料話，圓形天橋由建築師 #鍾華楠 設計。為咗證實呢一點，企鵝睇兜大學圖書個有關天橋同 #香港建築 嘅書、借晒圖書館入面由鍾華楠撰寫或編輯嘅書、摷勻M+藏品及檔案、打埋電話去問鍾華楠建築設計事務所，都搵唔到資料證明圓形天橋由鍾華楠設計。
不過，亦多得呢個機會，企鵝對鍾華楠嘅認識多咗。
同時間，企鵝比對鍾華楠嘅生平，同圓形天橋嘅興建計劃。根據1985年8月22日《南華早報》簡訊報道，天橋由海成建築（Hoi Shing Construction Co）興建，並未提及鍾華楠。按常理，自山頂爐峰塔喺1972年落成後，鍾華楠已經享負盛名，若果圓形天橋真係出自其手筆，1985年的新聞理應會提及佢吖。
直到企鵝終於喺路政署搵到圓形天橋圖則，謎底終於解開！
原來誤會源於大家都姓「鍾」。
圓形天橋圖則由署名DCS Chung嘅路政署職員繪畫，時為1982年7月。除咗繪圖，DCS Chung亦闡明呢條天橋嘅設計考慮因素（Design Consideration），指出為咗讓呢個位於商業中心嘅交通要塞行車暢順，須建造一條天橋俾行人橫過繁忙嘅馬路，以策安全。
呢條天橋不單止要連繫怡和街、糖街同邊寧頓街，仲要通往怡和街上嘅電車站，再加上周圍高樓林立，空間有限，為免出現不規則嘅多邊形，有礙觀瞻，就採用環形設計。DCS Chung咁樣寫：
This layout fit well with the road junction and is aesthetically pleasing. It is hoped that this footbridge will become an attractive feature in the area.（這個佈局跟該道路交界處相融，美觀宜人。期望這條行人天橋能成為區內受歡迎的景點。）
兜兜轉轉搜集咗一堆資料，企鵝最想搵到嘅，其實就係圓形天橋設計師本尊。幾經波折，幸得鵝友神通廣大，介紹再介紹下，企鵝終於搵到DCS Chung本人！
DCS Chung極為低調，唔方便上鏡受訪，但樂意回答企鵝嘅問題。以下企鵝姑且用「鍾先生」代稱DCS Chung。
鍾先生喺1979年加入政府，任職土木工程師，現已轉投私人企業。鍾先生強調，任何政府工程都唔係個人力量可成就，而係團隊嘅努力，話當年接手跟進項目時，已收到指示要將天橋設計成環形，由佢負責落實呢個構思，具體地繪畫成施工圖則。
企鵝查資料時睇到，有人認為圓形使用率低，係因為橋身過高、橋面過窄，批評圓形天橋比一般行人天橋要行多幾級，但又不足以應付人流。鍾先生就解釋，為顧及電車喺橋下通過，必須挑高橋身，保留足夠空間俾架空電纜；橋面雖然只有2.5米闊，但由於是環形，意味兩邊加起來有5米闊，按當時的評估能應付人流有餘。
對於有人嫌圓形天橋阻埞，鍾先生聽來有少少苦笑咁話：「留喺度都好吖，咁有時唔一定用到斑馬線嘛，有條橋都叫有多個選擇，留喺度都好吖。」
樗樹唔係廢柴，圓形天橋亦非廢橋，有用定無用，視乎角度㗎咋！
【彩蛋】
1985年8月22日《明報》、《華僑日報》同《南華早報》，各有一則短短幾十字嘅caption story，報導圓形天橋嘅啟用。兩份中文報章雖然標題唔同，但相片、內文完全一樣，如下：
本港首條環型有蓋行人天橋昨晨啟用。
天橋位於銅鑼灣一繁忙交界處之上，建築費為三百萬元，連接糖街、怡和街及邊寧頓街，為行人提供安全橫過馬路設施。天橋設計獨特，共有18對拱型支架，支承橋的上蓋，令外形更加美觀及特出。
有關工程並包括重修及擴闊怡和街、邊寧頓街及糖該部份路面，以改善該區的交通。整項工程建築費用為六百六十萬元，將於年底完竣。
某夜，企鵝第N次踏上圓形天橋，將自己沉浸喺天橋之中，繼續絞盡腦汁諗點樣寫圓形天橋嘅故仔好。
突然，唔知呢啲係咪叫 #福至心靈 ，由於此前碰上太多錯誤資料，以至於乜都唔敢信，乜都懷疑。話唔埋幾份報紙嗰百零字都有嘢錯……數吓有幾個拱先……
1,2,3,4,5……17？
再數一次，都係17？
深呼吸，再數多次，真係17？
得17個拱？內外圈都係？再數……
如是者，企鵝又數多三次；翌日再去再數三次，每一次都只數到17個拱，先至夠膽確認「圓形天橋由17對（而唔係18對）拱支撐上蓋」。
企鵝明白呢個實在係 #南極級冷知識 ，對大部份人來講都唔重要，校際常識問題比賽都唔會出現嘅問題。
不過，呢個令鵝震驚嘅發現，令鵝意識到，原來了解一條落成不過37年嘅天橋，亦非易事，必須fact check再fact check。
而檔案嘅保存，對尋根究底係非常重要！
【再多一隻彩蛋】
接落來呢一點係比「圓形天橋由17對拱支撐上蓋」更冷嘅冷知識。鳴謝鍾先生提供。
原來，支撐著天橋上蓋的拱，內圈跟外圈都分別有三款大小！咁係為咗遷就樓梯出入口、確保闊度足夠而設嘅。
鍾先生仲話，圖則都有畫出來㗎。現場好細心咁睇，都睇得出。
老實講，企鵝睇唔出，歡迎大家去考考眼力！