鵝尋日落街見銅鑼灣人頭湧湧，好多人都捧住一大盆蘭花啊、桔啊——醒起 #維園年宵 已經開鑼，一於去逛逛～
途經糖街，鵝開始流口水，事關呢頭好多東南亞食品店，有鵝最鍾意食嘅蝦片！一於買包邊行邊食先。來到 #斑蘭葉印尼餐廳，咦，呢款咁熟面口嘅？長方形一塊塊黃色嘅糕點，仔細望仲有一絲絲好似魚翅嘅紋路，咪農曆新年時啲餅家會賣嘅 #黃金糕 ？
鵝以往喺茶樓都食過，煙煙韌韌，椰汁味好濃～但近年似乎好少見咗⋯⋯
(⑉･̆-･̆⑉)
明明係賀年糕點，點解會喺印尼舖頭出現嘅？唔通印尼姐姐新年都食黃金糕？
一問之下，原來黃金糕係印尼嘅傳統糕點嚟㗎。印尼人平日會食黃金糕，而當地嘅華僑就會同香港人一樣當佢係賀年食品～
雖然仲有兩日至過年，但鵝唔等了，即刻買一細盒三色嘅來試吓。為免浪費膠盒，鵝拎咗隨身攜帶嘅食物盒出來，將黃金糕由外賣盒倒入去，再還返個外賣盒俾阿姐，阿姐亦樂意接受。
由於黃金糕實在太香，一換完盒，鵝忍唔住拎起一嚿來食，阿姐就笑住話：「煎香仲好味呀！」聽到鵝話等唔切，親切嘅阿姐又話：「咁我幫你用微波爐叮熱吖。」
實在太感動，黃金糕又香甜又煙韌，仲熱㗎添～黃色嘅有濃濃蛋黃味，青色嘅就有清甜斑蘭味，啡色嘅就有朕甘香。
(๑´ڡ`๑)
銅鑼灣真係食 #印尼菜 嘅好地方。事關印尼領事館就喺禮頓道，維園亦係印尼姐姐嘅假日聚會勝地，帶動呢頭開咗唔少印尼土產店同餐廳。銅鑼灣中心商場入面，仲有專做印尼人生意嘅士多、貨運店、髮型屋 & 眼鏡舖等等。
鵝會繼續 explore 多啲～
Comments