今日係 #達爾文日 ，係演化論之父 Charles Darwin (1809-1882) 嘅牛一。達爾文以 #天擇 （natural selection) 解釋演化，顛覆當時嘅科學界。佢一生到處遊歷，發現新嘅物種，對地質學亦有貢獻。
#達爾文 同企鵝都有段古。話說喺1831年，英國海軍去南美洲海岸考察，主要目的係勘察海岸線，同埋繪製港口圖，達爾文受邀加入。
有日，達爾文喺福克蘭群島上，遇到一隻令佢好難忘嘅企鵝 。喺佢嘅記事中，達爾文形容呢隻企鵝「無所畏懼」，一啲都唔驚企係面前嘅達爾文，勇往直前奔向大海，甚至撞到達爾文褪後幾步。達爾文形容，呢隻企鵝企得「筆直而堅決」，走路快速無比，甚至有啲似四腳動物。喺海度獵食時，企鵝飆上海面唞氣嘅速度快如閃電，驟眼睇分唔到係咪跳躍嘅魚。
呢個古仔後來收錄喺《 #小獵犬號航海記 》，1839年喺英國出版，記錄咗達爾文歷時五年嘅旅行，亦係佢聲名大噪嘅起點。企鵝喺呢趟偉大航行中都關關地事，真係與有榮焉，有啲沾沾～
Comments