鵝的字形散步

上回講到，鵝去咗丹麥餅店覓食。不過身為一隻文青鵝，除咗飲飲食食，對眼好快就被餅店周圍幾組招牌吸引住。呢啲招牌喺現代冷冰冰嘅電腦字形年代，係極之珍貴嘅寶藏！

\( ᐙ )/

 第一站 加路連山道：北魏真書立體雲石字臺

字體風格：香港北魏真書

呢度嘅字筆畫好有氣勢，「丹」同「麥」字嘅起筆同收筆都有強烈嘅頓角，字形重心偏高，離遠望去有一種視覺衝擊力，係香港以前啲舊式招牌最常用嘅大字。招牌當年由專人將大理石（雲石）逐個字手雕同打磨，變成厚實嘅立體字再固定喺水泥牆上，充滿 70 年代手工嘅樸實感。本來丹麥餅店嘅轉角兩邊各有一面雲石招牌，可惜喺 2016 年其中一面因為太舊、有剝落危險而拆咗，依家留落嚟嘅呢一面，係非常非常珍貴㗎！

 第二站 禮頓道：木紋面料配紅色美術字

字體風格：美術合體字（隸書合體篆書）

根據《銅鑼灣字型散步》嘅研究，呢款字體風格截然不同，融合咗中文書法「隸書」同「篆書」嘅靈魂。字體帶有隸書嘅特徵，橫畫起筆圓圓地、收筆微微向上翹（好似「丹」同「店」字），同時「餅」字又加咗篆書嘅藝術感線條，整體感覺古色古香得來、既溫柔又穩重。好鵝友兼《銅鑼灣字型散步》作者 Forrest Lau 就大讚呢個字體好獨特，而且極具實驗性。可能當年大眾一般鐘意古風，店家就搵師傅自創咗呢種「合體字」。加上店名「丹麥」明明係歐洲國家，但餅店偏偏賣最港式嘅麵包糕點，成件事真係 fusion！

 第三站：禮頓道店外黃底紅字菜單

字體風格：隸書

店外掛住嘅黃底紅字菜單，體現咗早期香港茶餐廳與冰室最標準嘅「水牌」製作工藝。字體採用隸書，筆劃特登加粗、字形敦實飽滿，方便食客離遠睇都一目了然。部分字嘅轉折位（例如「飲」字嘅𩙿字旁、「咖」字嘅口字旁）帶有強烈嘅民間書寫習慣。製作時，師傅要先喺黃色膠板上用漆筆起稿，再用人手將紅色壓克力膠片一片片鋸成字，最後手工黐上去，摸落去有微微凸起嘅立體手感。喺依家呢個年代，呢種手工藝真係已經買少見少。

各位鵝友下次經過，記得都抬頭欣賞吓呢啲街頭字體藝術品啊！

୧((〃•̀ꇴ•́〃))૭