鵝嘅野草同屋主

只要上過鵝屋企嘅，都一定見過香港研究書櫃窗檯上嘅一棵野草，佢係同鵝同居咗起碼三年嘅同屋主！

點解話「起碼三年」呢？

2021年底，種喺盆入面嘅仲係俗稱「怕醜草」嘅含羞草。後來佢枯萎咗，鵝發現有其他芽仔趁機「標」出來！！可能佢哋已經喺啲泥入面一段時間，當本來強勢嘅草積弱，就搶住生長～試過有酢漿草，又見過苔蘚，但留得最耐嘅都係而家呢棵草，枝條生得好狂野，好似識跳舞咁。啲葉對生，摸起來有一層柔軟嘅毛毛喺面。

(๑•̀ ω •́)ノ

不過，就算朝見晚見，鵝都係唔知佢點稱呼，反而知道佢好鍾意飲水同曬太陽，差唔多每日都要淋啲水。仲要經常修剪吓佢啲枝條，因為舊葉甩完一輪，好快又生一堆新葉！代謝快過鵝換毛多多聲呀～

喺銅鑼灣野草調查過後，鵝請咗WEEDsilience調查小組到屋企坐坐，梗係把握機會請教專家們。經王韶昀（Mercury）辨認，原來佢叫做霧水葛，平時喺路邊、田野都會有機會見到呢。

個名好靚喎！人類用「霧水情緣」來形容似霧一樣、短暫朦朧嘅曖昧關係，鵝同霧水葛呢一段情緣已經三年，而且to be continued⋯⋯

(๑•́ ₃ •̀๑)