香港大球場外圍

鵝友曾經喺銅鑼灣讀書，佢靜靜雞同鵝分享一個佢讀中學時常去拍拖嘅地方 ：#香港大球場 外圍。

鵝尋日上晝去行咗個圈～

由 #東院道 大球場正門嘅公眾入口廣場出發，上樓梯後，你會見到左邊有個窿，喺呢度行入去，就會去到東翼看台底（其實即係櫈底），沿住呢個遮蔭位一路行，感受到陣陣涼意，見到隔籬山坡上嘅樹，青翠欲滴，幾舒服～

慢慢散步，路旁泊咗幾架車，又擺咗啲工程器材，可能係為下月舉行嘅 #七欖 做準備？然後途經地政總署嘅清拆組 office & 掃桿埔抽水站，遇見遛狗街坊 & 呼吸新鮮空氣嘅學生哥，唔覺唔覺，兜到奧運大樓，原來，鵝已圍住大球場行咗一個圈。

大球場即將重建，未來好幾年都圍封，工程前，鵝會多啲來散步，下次夜晚來。