鵝嘅身世，其實有頭冇尾，係丁新豹博士話俾 Yolanda Ng 伍婉婷 知，Yolanda再話俾 打書釘 Nose in the Books 知，口耳相傳得來。咁趣怪嘅故事，令班圖書館人類聽完爆發小宇宙。
如果喺銅鑼灣，真係有隻咁嘅企鵝生活，鵝會見到、聽到咩？對啲咩好奇？鵝想銅鑼灣變成點呢？
佢哋話，要同鵝一齊講銅鑼灣嘅社區故事喎。
自此，鵝嘅量詞由一隻變做一群。呢群人類變身鵝嘅助手，同鵝遊走社區大街小巷，各自發射雷達、舞動觸角，興奮地寫字影相畫圖，七嘴八舌拼湊成一篇篇大家睇到嘅post同長文。讀者睇完，會話返感想俾鵝知，或者提供線索，請鵝繼續追查。
__φ (．ө．
就好似Walter Benjamin筆下嘅 #城市漫遊者（flâneur）咁，鵝亦full-time散步、觀察同思考。唔同嘅係，鵝會關心社區嘅其他動植物，又渴望以記錄社區，邀請大家共同探討同營造銅鑼灣嘅將來。
假如每個故事都係有生命嘅，佢哋會延展生長到咩地方？或者，有朝一日，鵝會搵得返陪鵝出門周圍貢嘅牛奶公司員工？唔知佢又有冇幫鵝留過倩影呢？
♫ ꒰ ･◡･๑ ꒱
最近，鵝搵到更多線索，呢個「如果在銅鑼灣，一隻企鵝」，可能唔係如果，係真有其事！等鵝整理好就講大家聽！！
Comments