近日天朗氣清，但鵝有個沉重嘅消息要同大家講。鵝喺上年尾寫過嘅 #坐監嘅樹 ，已經俾人斬咗。
今年初，鵝同小雲去散步拍拖。路經 #加路連山道 ，鵝慣常地向上望，駭然發現三顆樹不知所終。鵝捽捽眼，唔通睇錯？！
呢三棵位於 #南華會 地盤、掃桿捕運動場正門對面嘅樹，上年 11 月鵝第一次來睇佢哋時，雖然慘遭圍街板圍封，其中木棉嘅樹幹深陷圍街板嘅金屬結構，但三棵樹樹冠都仲好茂密，可見其生存意志之頑強！
勢估唔到係鵝出完 post 後無耐，三棵樹就俾人斬咗。
到底係邊個斬？點解要斬？
鵝返到圖書館，唔知搵邊個先解答到問題。樹種喺馬路旁，係公家地。但圍街板屬於南華會。鵝惟有根據 #公開資料守則 ，向幾個政府部門查詢，並且索取樹木報告。最後，負責嘅康文署回覆鵝，解釋舊年收到南華體育會通知，得悉南華會打算拆卸圍板，申請斬樹。
#康文署 認為拆卸圍板後樹木嘅健康同結構問題，可能會危及公眾安全，因此批准南華會移除三顆樹。兩棵石栗同一顆木棉，於2023年12月9日由南華會移除⋯⋯
「移除」聽落冇咁血淋淋，其實即係斬樹。
睇樹木報告，好似睇驗屍報告。三棵樹嘅主要死因係嚴重物理傷害（serious mechanical damage）。記得上次專業樹藝師解過俾鵝知，樹幹深陷圍板、長出腫脹嘅組織，一定係長年累月至形成。但棵幾時開始？會唔會早啲發現，啲樹可能仲有得救？
於是鵝再問康文署索取三棵樹歷年所有嘅樹木報告，希望搵到啲線索。康文署提供嘅報告，最早係2015年，加上之前翻查嘅資料，以下係企鵝整理嘅事件簿。
2008年12月
由 Google 街景現存最早紀錄可見，圍街板已困住三棵樹
2015年
康文署發現木棉樹有物理傷害（mechanical damage）
2018年
康文署發現右邊石栗因與街板摩擦而受損
2021年
康文署發現木棉有盤根問題（girdling roots）
2023年
南華會向康文署稱計劃拆卸圍板
2023年12月
南華會斬咗三棵樹
咁多年唔理，點解南華會喺上年12月突然覺得啲圍板非拆不可？幾時發現地盤圍板傷害三棵樹木生長？有冇嘗試過保住啲樹？鵝已去信南華會追問，未收到回覆。
其實三棵樹嘅委屈，何止坐冤獄同枉死。根據康文署報告，2021起木棉仲有 #盤根 問題（girdling roots）。2023年「死因報告」上嘅照片，亦見到樹根打晒圈，團團勒著自己。盤根反映地下空間唔足夠俾樹木生長。長期盤根會窒礙樹木輸送水同營養，慢慢佢哋就冇咁健康。
鵝睇返啲樹生勾勾嘅相片時，見到三棵樹牛高馬大，啲葉仲好碧綠，真係好心痛。睇到樹穴（tree pit）嘅close up時，發現一個之前冇留意嘅細節，咦，頭重腳輕嘅？
樹根其實需要同樹冠一樣大嘅空間，木棉同石栗係大喬木，高同闊都有十幾米，但佢哋嘅樹穴實在太細。樹穴太細，同樣會導致生長空間不足，令樹木營養不足。
其實嗰條行人路咁窄，又喺馬路邊，係咪真係適合種植大喬木？種小喬木，避免植物生長空間不足，亦唔會遮擋駕駛者嘅視線，有利交通安全，會唔會好啲？
康文署話每年都會做樹木風險評估，但所謂嘅「風險」，係指對於人類嘅風險，而唔係樹木生死存亡嘅風險。移除樹木嘅準則，在於佢哋會唔會影響人類、附近嘅建築物同財產。
但地球唔係淨係得人類㗎麻！
Comments