唐樓上嘅煙囪

連日落雨，難得好天，鵝即刻上天台曬吓自己，同陽光玩遊戲～

鵝留意到，天台有兩條窄長嘅柱，每條柱個頂再多一座「屋仔」，驟眼睇有啲似希臘神殿，之前都冇特別好奇。但望望吓，隔籬唐樓又有，對面唐樓又有喎。究竟呢啲神秘嘅柱係咩嚟㗎呢？有咩用途？

鵝翻查屋企所在嘅唐樓平面圖，上面標明咗佢哋係煙囪！

喺大半個世紀前，香港嘅一般市民係燒柴或者炭煮食嘅。嗰時未有抽油煙機，廢氣係經煙囪排出室外㗎！鵝屋企附近呢堆 50 年代起好嘅唐樓，好多都保留咗呢個建築特色。不過，而家喺室內，已經睇唔到灶台或者煙囪嘅痕跡喇。

鵝塞個頭埋去，觀察煙囪內嘅結構，發現佢哋係磚造嘅，而個窿深不見底⋯⋯鵝忽發奇想，跳入去會唔會好似 Super Mario 瓹水管咁，通往異世界呢？

(๑ ´ㅁ` )