話說，鵝最近行誠品，發現新出版嘅《 #愚公不愚》好詳細地講述咗利氏家族喺銅鑼灣移山興業嘅過程。本書大大本、好墜手，鵝抬佢返屋企行樓梯時都少少索氣，唔知咁樣算唔算體驗過「移山」呢？
(ง •̀ v •́) ง
鵝仲未讀完呢本著作，不過留意到啲得意嘢，急不及待想同大家分享～
根據本書，喺鵝尚未喺銅鑼灣蒲頭嘅1924年， #利希慎 借咗利園山上嘅「二班屋」，即係原本嘅 #怡和洋行 副經理大樓，俾莫鶴鳴、 蔡哲夫等文人組成「#愚公簃詩社」，其後聯同其他詩社，合組「#北山詩社」，吟詩雅集。
莫鶴鳴係任職太古洋行海口買辦嘅收藏家，佢將自己收藏嘅紫檀傢俱擺入二班行，改叫棟山莊做「北山堂」。響應佢哋徵詩嘅人過百，北山詩社當時亦成為香港開埠以來最大嘅詩社。可惜喺第二年，省港大罷工爆發，令詩社被逼解散。
( ･ิ ͜ʖ ･ิ) ??
本書講「北山」呢個名，係出自《列子·湯問篇》 #愚公移山 嘅典故，記寓利希慎移山發展嘅決心。咁鵝都決心搵返個故事睇：
／太行、王屋二山，方七百里，高萬仞。本在冀州之南，河陽之北。北山愚公者，年且九十，面山而居。懲山北之塞，出入之迂也，聚室而謀曰：「吾與汝畢力平險，指通豫南，達於漢陰，可乎？」雜然相許。
其妻獻疑曰：「以君之力，曾不能損魁父之丘，如太行王屋何？且焉置土石？」雜曰：「投諸渤海之尾，隱土之北。」遂率子孫荷擔者三夫，扣石墾壤，箕畚運於渤海之尾。鄰人京城氏之孀妻，有遺男，始齔，跳往助之。寒暑易節，始一反焉。
河曲智叟笑而止之，曰：「甚矣，汝之不惠。以殘年餘力，曾不能毀山之一毛，其如土石何？」北山愚公長息曰：「汝心之固，固不可徹，曾不若孀妻弱子。雖我之死，有子存焉；子又生孫，孫又生子；子又有子，子又有孫。子子孫孫，無窮匱也。而山不加增，何苦而不平？」河曲智叟亡以應。
操蛇之神聞之，懼其不已也，告之於帝。帝感其誠，命誇娥氏二子負二山，一厝朔東，一厝朔南。自此，冀之南，漢之陰，無隴斷焉。／
有語譯話，愚公係住喺「北山」嘅。另一啲就話愚公住喺太行山同王屋山以北，似乎唔係真係有「北山」喎。
睇到鵝頭都大埋。但無論北山存唔存在都好，鵝覺得北山堂同北山詩社個名都好好聽，好優雅呢。
(๑•ㅂ•)و ✧
Comments