企鵝試食報告

前排喺 #維園 睇完 #蕨類植物 ，鵝成個腦都係 #蕨餅，今日終於有機會啦！

٩(๑ᵒ̴̶͈᷄ᗨᵒ̴̶͈᷅)و

上回咪講到，純正嘅本蕨粉價格昂貴，因此唔少市面上嘅蕨餅就會以平啲嘅木薯粉、葛粉等澱粉代替，但口感就唔及用本蕨粉整嘅蕨餅咁蔫韌。

話說今日鵝約咗幾位鵝友聚一聚，其中好有實驗精神嘅鵝友 Jiji，竟然喺 #銅鑼灣 蒐羅咗三款蕨餅，俾大家盲測試食，考考鵝哋食唔食得出邊款係真．蕨餅。

見 Jiji 咁有心思，鵝都唔怠慢，認真地邊試味邊做筆記～

(≡•̀·̯•́≡)

鵝口細，首先試咗最的骰、最精緻嗰款。黃豆粉裹滿細細粒嘅蕨餅，咬口有啲實淨，唔算好蔫韌。鵝友 B 話細嚼下帶有青草味，唔錯。

然後就係一團黑掹掹嘅⋯⋯原來係黑糖味蕨餅。食落好似啫喱，亦有鵝友話似蒟蒻、大菜糕，而且大家一致覺得太甜。好喇，next！

最後係大大嚿、淹沒喺黑糖同黃豆粉裏面嘅一款。雖然其貌不揚，但鵝覺得口感最好，非常蔫韌。鵝友話呢款蕨餅「延展性高」，要夾起佢都有難度啊！

試食嘅四人一鵝中，有三個都估，只有大大嚿蕨餅至係用蕨粉做嘅真・蕨餅。

「應該三款都有用蕨粉做，只係比例唔同。」試食時一直保持沉默嘅鵝友肥仔，突破盲點咁話：「如果不含蕨粉，又叫蕨餅，違反 #商品說明條例 㗎喎。」

(ﾉﾟ0ﾟ)ﾉ~

Jiji 微微笑，原來謎底就如肥仔所講，三款都含蕨粉。

根據包裝上嘅成分表，的的骰骰而帶青草味嗰款，除咗蕨粉，亦用咗蓮藕粉。佢來自 #加路連山道 #氷屋。

至於黑糖蕨餅，就加咗化製澱粉。 呢款喺係 #SOGO 超級市場市買嘅，牌子KURO Warabimochi。

只有大大嚿蕨餅係齋用蕨粉。不過，呢款購自 #希慎廣場 #甘味處鎌倉 嘅蕨餅，據講係每日新鮮製造，即係唔算 #預先包裝食物 ，因此亦冇食物標籤。關於成份，係店員講俾 Jiji 聽嘅。

現在已經係夜深，鵝仲回味緊啲蕨餅，於是又查資料頂住先。原來蕨餅喺日本歷史好悠久，可以追溯到平安時代（794-1185），據說醍醐天皇仲好鍾意食添。到咗江戶時代，日本交通開始發達，社會各階層嘅人都可以周圍去。呢個時候，喺人群聚集嘅地方，例如神社、寺廟外面，都會賣當地出產嘅和菓子，而蕨餅就係新坂嘅特產，即依家嘅靜岡掛川。時至今日，蕨餅依然會喺日本節慶出現，或者作為賀禮、散水餅。

講講吓就更想食多嚿喇⋯⋯

#企鵝試食報告

#利申冇收廣告費㗎囉