企鵝執煙頭

以寫書、淨灘等方法推動環保嘅楊婷（大便妹） @imshepoo，喺 2026 年發起 #拾萬煙挑戰，鵝都參加埋一份！上個月 25 號，趁天氣幾好，鵝拎埋自製樽同埋夾仔，由波斯富街附近起步，出發做隻「執煙鵝」！

 (۶•̀ᴗ•́)۶

眨下眼，自製樽仔已經滿咗啦，不過鵝點會就咁畀佢完？嗱嗱臨返屋企，換個兩公升嘅水樽繼續密密執。其實呢，大街上唔多煙頭，但一入到啲小巷就一地都係。

-`д´-

行入第一條後巷，鵝已經執到 180 個煙頭。啲煙頭好多時會卡咗入啲罅隙度，要清理都唔係咁易，要逐枝撩出嚟～都幾花眼力㗎。鵝繼續向維園方向巡邏，見到好多室外食煙嘅位置，其實有擺放收集煙頭嘅罐㗎。可惜，罐嘅附近依然會有好多煙頭。

除咗後巷之外，盆栽都係一個煙頭黑點。例如鵝係柏寧酒店附近，近一米高身高嘅盆栽入面，執到成 83 個煙頭，太誇張啦！有啲睇落都抌咗喺入面好耐，已經乾晒同發黃。

要知道⋯⋯植物係唔食煙頭㗎，嗚嗚～煙頭入面有好多有害嘅化學物質同重金屬，污染土壤。而且，煙頭係由一種叫醋酸纖維素嘅塑膠組成，分解唔到。假如冇妥善咁處理啲煙頭，大風落雨都有可能去咗自然環境。

( ꐦ•᷄ὤ•᷅)و

鵝最後喺希雲大廈附近完結今次嘅執煙頭旅程。望望個水樽，已經塞滿煙頭，仲傳出陣陣嘅煙臭味，快快脆扭實個樽蓋。

由於不斷踎吓、行吓，又烏低身夾煙頭嘅關係，鵝掌鵝翼都攰到震震吓⋯⋯嗯，體能訓練！

總結一下，鵝喺 90 分鐘嘅時間入面，鵝總共執到 814 個煙頭，數數鵝掌，1 分鐘超過 9 個，即係每 6 至 7 秒就執到 1 個煙頭呢～但都仲有好多煙頭未執⋯⋯

(　-᷄ ω -᷅ )